Canadap Qalasersuarmut tunngatillugu piumasaqaatini tunniuppai
Danmarkip Kalaallit Nunaatalu issittup imartaani immap naqqata oqartussaaffiginissaanut tunngatillugu piumasaqaatitik sapaatit-akunnerata siuliani tunniuppaat. Naalagaaffiit Peqatigiit Imaani pisinnaatitaaffiit pillugit isumaqatigiissutaat 1982-imeersoq malillugu Naalagaaffiit Peqatigiit ilisimatuussutsikkut paasissutissat maanna misissortussanngorpaat nunallu sorliit imartat sorliit naqqanik oqartussaaffeqarnersut aalajangiiffigalugu.
Tamannalu aningaasanik milliornerpassuarnik naleqarsinnaavoq, immap naqqata ilua uuliaqarluarlunilu gasseqarluarmat.
Canafdallu piumasaqataani Naalagaaffiit Peqatigiinnut maanna nassiuppai. Canadap paasissutissanik katersuinermi Danmark/Kalaallit Nunaat, Rusland aamma USA suleqatigisimavai. Canada ukiut qulit sinnerlugit misissuisimavoq nunamilu imaanilu ilisimatuussutsikkut misissuinernut 1 milliard koruunit sinnerlugit atorsimallugit, aamma aqqartartut atorlugit misissuisimavoq.
Paasissutissat katersorneqartut takutippaat Canada immap naqqani Lomonosovip qaqqaanut atasoq, Ruslandillu tamanna aamma oqartussaaffigiumallugu piumasaqaateqarsimavoq. Canadap piumasaqaatigisaa Kalaallit Nunaata 3/4-iliatut annertutigivoq.
Paasissutissat Naalagaaffiit Peqatigiinnut tallimanngorpat tunniunneqarnissaat siunertaavoq, Canadamili premierministerip ullumi piumasaraa piumasaqaateqarnermi Qalasersuaq aamma ilaatinneqassasoq. Canada taamaasilluni paasissutissanik maanna tunniussisinnarluni sinneri qanittukkut tunniuttussanngorpai.
Naalagaaffiit Peqatigiit ukiut tallimat atorlugit misissuisinnarluni aalajangiinissaa naatsorsuutigineqarpoq.
