Canadap EU-llu akornanni killilersugaanngitsumik niueqatigiinnissamik isumaqaatigiissut atuutilersoq

Canadap EU-llu akornanni killilersugaanngitsumik niueqatigiinnissamik isumaqaatigiissut - CETA-mik taaguuteqartoq - ullumikkut atuutilerpoq.

Europami nunat Canadallu akornanni niueqatigiinnermi aporfiusartut isumaqatigiissuteqarnermi peerneqarput, tunisassianillu kiffartuussinernillu Atlantiku ikaarlugu niueqatigiissinnaaneq taamaalilluni ajornannginnerulerlunilu akikinnerulissaaq.

Isumaqatigiissulli nunatsinnit ilaatigut isornartorsiorneqarsimavoq.

AAMMA ATUARUK Namminersorlutik Oqartussat EU-mut nutaamik isumaqatigiinniaqquneqartut

Killilersugaanngitsumik niueqatigiinnissamik isumaqaatigiissutip nunatsinni tunisassianik EU-mut nioqquteqarnermut annertuumik unammilertoqarsinnaanera sulisitsisut peqatigiiffiata, GE-p, ernummatigaa, pingaartumik aalisakkanik tunisassianut tunngatillugu. Aamma Naalakkersuisut isumaqatigiissut ernumanartoqartillugu oqaatigisimavaat.

Taamaammat GE-p Naalakkersuisut kajumissaarsimavai EU-mut isumaqatigiissuteqaqqullugit, nunatta Canadamit unammillerneqarnerata sakkortusinerani annaasanut taarsiutaasussamik.

AAMMA ATUARUK Asiami niuernikkut isumaqatigiissuteqarneq avammut niuernermut iluaqutaassaaq

Royal Greenlandilli pisortaata, Michael Thinghuusip, nalunaarutigaa isumaqatigiissut ingerlatseqatigiiffimmit ernumagineqanngitsoq. Ingerlatseqatigiiffiummi Kangiani niuerfinnut tunisaqarnerunissaq maannakkorpiaq annertuumik sulissutigaa.

Killilersugaanngitsumik niueqatigiinnissamik isumaqaatigiissummik tapersersuisut naatsorsuutigaat EU-p Canadallu akornanni niueqatigiinneq isumaqatigiissuteqartoqarneratigut 20 procentint missaannik.