Camp Century pillugu politikkikkut aalajangiisoqarnissaa isumaqatigiissutigineqartoq

- Akisussaaffik politikkikkut aalajangigassaasoq isumaqatigiissutigaarput, imaanngitsoq akisussaaffik inatsisitigut nassaariniarneqassasoq, Kelly Berthelsen oqarpoq.

Amerikamiut sakkutooqarfigisimasaata avatangiisinut qanoq mingutsitsisinnaatiginera misissorneqassasoq, aamma saliinissamut akisussaaffimmik naalagaaffiit akornanni inatsisitigut inissiisoqarsinnaanersoq pillugu USA-p Danmarkimik illersornissamut isumaqatigiissutaat misissorluarneqassasoq, nunanut allanut tunngasunut ministeriusimasup, Kristian Jensenip Nuummi novembarimi ataatsimiinnermi oqaatigaa.

AAMMA ATUARUK Nunarput Camp Centurymi saliinermi akisussaaqataaratarsinnaasoq

Akisussaaffik sukkanerusumik nunatta inissinneqaqquaa, Camp Centurylu Nunatta Danmarkillu akornanni politikkikkut akerleriissutaavoq. Ataatsimiitialialli marluk suliaq pillugu Københavnimi juullinnginnerani ataatsimiikkamik isumaqatigiittut, Kelly Berthelsen oqarpoq.

- Tusaasinnaasakkalu malillugit Folketingimi ilaasortat akisussaaffimmik inissiinissamut kajumissuseqartorujussuupput, Kelly Berthelsen oqarpoq.

Nunanulli allanut tunngasunut ministerertaaq Anders Samuelsen siulimi suliaanik allannguinani ingerlatseqqittoq, Aaja Chemnitz Larsenip apeqqutaanut akissummi takuneqarsinnaavoq.

-  USA Camp Centurymi saliinissamut naalagaaffiit akornanni inatsisit najoqqutaralugit akisussaasuutinneqarsinnaanersoq danskit naalakkersuisui inatsisinik misissueqqissaartut, nunanut allanut tunngasunut ministeri allappoq.

AAMMA ATUARUK Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa