Nunarput Camp Centurymi saliinermi akisussaaqataaratarsinnaasoq
Danskit avatangiisinut ministeriat danskillu nunanut allanut tunngasunut ministeriat Folketingimi isumasioqatigiinnermi ullumi pingasunngornermi taama oqarput.
Kalaallit Nunaatali akisussaaqataanissaa ministerit mattutinngikkaat, Nunanut allanut tunngasunut ministeri Kristian Jensen oqarpoq.
- Suut akisussaaffigineqassanersut paasiniarlugit misissuinissatsinnut piffissaqarnerurosuppugut. Qanoq akisussaaffeqartiginitsinnik inatsisitigut takussutissiisinnaasunik ersarissaasoqatariaqarmat.
Danmarkimilu naalakkersuisut naapertorlugit Danmarkip eqqagassat avatangiisinut ulorianartut, ilaatigut Camp Centurymi sakkutooqarfiusimasumiittut pimoorulluinnarpai.
Aamma atuaruk Danskit nunanut allanut tunngasunut ministeriat Camp Century pillugu isumasioqatigineqalersoq
Taamaammat suliffeqarfinnut misissuisinnaasunut naalakkersuisunit neqeroortitsisoqareerpat, Avatangiisinut ministereqarfiup sakkutooqarfiusimasumi avatangiisinik mingutsitsinerit annertussusaat piaartumik misissorniarpai.
Kikkulli saliisuussanersut massakkut oqaatigissallugu siusippallaarpoq.
Avatanngiisinut akisussaaffik Kalaallit Nunaata 1989-imi tigunikuugaa, avatangiisinut ministeri Esben Lunde Larsen erseqqissaavoq.
- Avatangiisunut akisussaaffik Kalaallit Nunaannit tiguneqareersoq innersuutiginissaanut akuerisariaqarpoq.
Isumasioqatigiitoqareerpallu Kalaallit Nunaata saliinermut akisussaaqataalersinnaanera itigartitsissutiginianngilaa:
- Isumaqarpunga pissutsit Kalaallit Nunaanniittut Kalaallit Nunaannut attuumassuteqartut, aamma Kalaallit Nunaata namminersorlutik oqartussaanneq akisussaaffigivaa.
Taamaattumik misissuisoqangajalerneranut atatillugu pissutsit tamakkua Namminersorlutik Oqartussallu oqallisigeqqaassavut
Avatangiisinut ministereqarfiup Camp Centuryp eqqaani avatangiisinik misissuinissat suliariumannittussarsiuussinissallu maanna piffissalernialerpaat.
