Imerniartarfiit sivisunerusumik ammasalernissaat imerniartarfiutillit isumaqatiginngilaat
Imerniartarfiit sapaatip-akunnerata naanerani sivisunerusumik ammasalersinnaanissaat pillugu siunnersuut Inatsisartut ukiakkut ataatsimiinnermi aalajangiiffigisussaavaat, imerniartarfiit ullaassakkut nalunaaqutaq tallimat tungaannut ammasalersinnaanissaat pillugu isummertussaallutik.
Assersuutigalugu nangikkiartarnerit sapinngisamik ikilisinneqarniarput, nangikkiartoqarnerani ilaatigut eqqissiviilliortoqartarnera aamma pinngitsoortinniarneqarluni.
Imerniartarfiilli ammasarfii sivitsorneqarpata tamanna nangikkiartarnerit ikilisinneqarnerannik malitseqassasut imerniartarfiutillit peqatigiiffiata ilimaginngilaa, kingusinnerusukkut nangikkiartoqaaannartalernissaa oqaatigalugu.
Imerniartarfiit sivisunerusumik ammasalersinnaanissaat kissaatiginngikkitsik, peqatigiiffiup siulittaasuata Helge Tangip tassunga atatillugu oqaatigaa:
- Imaassinnaasoq sivisunerusumik katerisimaartoqalersinnaasoq, imaassinnaavorlu kaaviiaartitaqarnerulaalersugut. Kingunerisinnaasaali pitsaanngitsut pitsaanerusunut amerlanerussapput, Helge Tang oqarpoq.
Ikiaroornartut sakkortuut ajornartorsiutaalernissaat aarleqqutigigitsik taassuma oqaatigaa, ikiaroornartummi sakkortuut ullumikkut ajornartorsiutaanngimmata, taanna oqarpoq.
- Hashi ajornartorsiutaareerpoq, inuilli assersuutigalugu sivisunerusumik illoqarfimmiissinnaalissappata nunani allani misilittakkat takutippaat ajornartorsiutit amerlissasut. Ikiaroornartut sakkortuut ajornartorsiutaalissapput, inuusuttut fiisternerusalernerannik kinguneqakkajulluni, Helge Tang oqarpoq.
