Borgmesterip angajoqqaat iliuusikinnerarpai

Angalanermi nalunaarusiaq borgmester Jørgen Wæver Johansenip nuannaarutigaa, erseqqissarlugulu kommuni kisimi akisussaasuunngitsoq. Inuiaqatigiinuku akisussaaffii. Borgmesterilu naapertorlugu aalajangersimasut iluatsinngitsoorsimapput.

- Minnerunngitsumik angajoqqaat akisussaaffeqartorujussuupput. Ilaqutariippassuit ingerlalluarput, nassuerutigisariaqarparput ilaqutariit ilaat ingerlalluanngitsut, Johansen oqarpoq.

Kommunimik isornartorsiuineq 

Nalunaarusiami uparuarneqarpoq kommuni kisimi akisussaasuunngitsoq. Taamaakkaluartoq MIO'p Kommune Kujalleq pinngitsuutinngilaa.

Suliat suliarinerat kigaattumik ingerlanneqarput, nalunaarutigineqartartut suliarineqanngikkaangamik aaqqissuussinermi puigorneqartarput. Angajoqqaat tapersersortissaaleqillutillu ilitsersortissaaleqipput, meeqqallu atuarfiata meeqqat angusarlunnerpaat naammassitittarpai.

AAMMA ATUARUK Kujallermi meeqqat naligiimmik ikiorneqanngillat

Taamatut oqaaseqarneq Namminersorlutik Oqartussat nakkutilliisuisa siorna saqqummiussaannut naleqquppoq. Tassani uparuarneqarmat kommuni isumaginninnerup tungaatigut amingartorujussuarmik suliaqartoq.

Nassuerutiginninneq aallarniutaavoq

Takusalli tamakku borgmesterip oqaaseqarfiginngilai. Erseqqissaavorli ajornartorsiutit aallaavii aaqqittariaqartut kinguneri kisiisa aallunnagit.

Suliassalli annertoorujussuupput borgmesterilu naapertorlugu suliassat suli annertoorujussuupput.

- Tamannali nassuerutigalugu ajornartorsiutit aaqqinnissaannut aallarniutaasinnaapput taamaalillunilu meerartatta siunissaannik tunngavissiuisinnaalluni, borgmesteri oqarpoq.

AAMMA ATUARUK Kommune Kujalleq Naalakkersuisunut ikioqquvoq