Borgmesterip Aalborgimut nassiussakinnerulernissaa piareersimaffigaa
Umiarsualiviutillit Royal Arctic Linellu akornanni sisamanngornermi ataatsimiittoqareersoq Aalborgip borgmesteriata Aalborg Havn A/S-illu siulittaasuata, Thomas Kastrup-Larsenip (S) tamanna siunnersuutigaat.
Illugiit Aalborg Havnip isumaqatigiissummit pioreersumik allaanerusumik akuersaarsinnaasaanik, Royal Arctic Linep 2025-p tungaanut Aalborgiliartarnissaanik qulakkeerisussamik ataatsimut ilusilersuipput, ataatsimoortumik tusagassiuteqarlutik nalunaarummi allapput.
AAMMA ATUARUK RAL ajunngitsumik avissaarusuttoq
Aalborg Havnip siulittaasua naapertorlugu suliffeqarfiup maanna isumaqatigiissummit allannguutitut akuerisinnaasai marluupput tassalu nunatsinnut umiarsuakkut nassiunneqartartut, 75 procentiinut appartitsineq imaluunniit RAL-ip Jyllandip avannaani umiarsualivimmut isumaqatigiissutini sivitsussagaa.
Jyllandip avannaani suliffeqarfiit namminersortut containerinik nunatsinniit nunatsinnullu assartuinermik pisariaqartitsitsisut isumannaatsooqqullugit tamanna pisaaq.
- Procentit annikinnerusinnaapput allaasinnaallutillu. Tamanna misissorneqassaaq, Thomas Kastrup-Larsen KNR-imut oqarpoq.
RAL-illi Jyllandip avannaani illoqarfissuarmi maanna tikittarfigisaani Aalborg Havni suliffeqarfiilluunniit allat ingerlatsisuussanersut takunissaat piareersimaffigaa.
- Taamaammat suliami uani isumaqatigiissuteqarsinnaanissarput neriutigaarput. Taamaalilluta Royal Arctic Linep attavinnik ammaaniarneranut suliniummi ikiuisinnaalluta, Thomas Kastrup-Larsen oqarpoq.
Borgmesteri: RAL-ip angallaviginninneq isumagissavaa
RAL-illi umiarsuaateqarfiup Aarhusimit 2019-imiit aallartalernissani aalajangiusimavaa – tassa Aalborg Havnimut maanna isumaqatigiissutaareersup killissaanut ukiut pingasut sioqqullugit.
Tamannali RAL-ip umiarsualiit marluutillugit ukiuni taakkunani tikittarfiginiarnerai umiarsuaatileqatigiiffilluunniit alla atorlugu Aarhusip Aalborgillu akornanni angalasarniarnersoq aalajangersimanerlugu, RAL-imi pisortaanerup, Verner Hammekenip KNR-imut oqaatigerusunngilaa.
AAMMA ATUARUK RAL-ip umiarsuai Aarhusimut tulattalissapput
Thomas Kastrup-Larsen naapertorlugu isumaqatigiissut 2025-mut sivitsorneqassappat Aalborg Havnip Aalborgimut containerinik angallassisartussaq, suliffeqarfik allaanani RAL-iussasoq aalajangiusimavaa.
- Royal Arctic Line Aalborgimukartartuussaaq. Taama tusagassiutinut nalunaarummi (sisamanngornermeersoq, aaqq.) allassimavoq, Thomas Kastrup-Larsen oqarpoq.
Taarseeqqussuteqarunnaarpoq - maannamut
Illuatungeriilli ataatsimiinnerat qasukkarnerulerpasippoq. Ilaatigut Aalborg Havnip RAL-ilu taarsigassiiniarnermik siorasaaruteqarnera taamaatinneqarmat. Tamanna illugiit KNR-imut uppernarsarpaat.
AAMMA ATUARUK Aalborgip umiarsualiviata Royal Arctic Line tatiniarsarigaa
Tamatumanili RAL-ip isumaqatigiissutaareersumik 2022-p tungaanut atuutsitsiinnarnissaa apeqqutaasoq, Kastrup-Larsen erseqqissaavoq.
- Soorunami una unittoorpat susoqanngippallu, aaqqiagiissinnaajunnaavilluta, taava ippassaq naapinnginnitsinni killiffipput killiffigileqqissavarput.
