Bonusisiaqartitsineq Ippiarsummi nuannaarutigineqarpoq

- Neriuuteqarfigaarput, soorunami. Kajumissaataasinnaammat, Hendrine Poulsen Lund oqarpoq.

Qaammat naallugu suliartortuaannartut tatiginassutsimut tapisiaqartalissasut, Kommuneqarfik Sermersuup sulisullu kattuffiata SIK-p isumaqatigiissutigaat.

Ippiarsummi sulisut napparsimallutik sulinngitsoortarnerat qaammatikkaartumik nalilersorneqartarpoq.
Nalilersuisarnerillu aallaavigalugit sulinermik kajuminnarsaanikkut sulisut sulinngitsoortarneri ikileriaateqarsimapput. 
Taamaattorli akissarsisoqarsimatillugu nalunaarani sulinngitsoortarnerit takussaajunnaavissimanngillat.  

 - Una sulinngitsoorneq, tassa nalunaarnani sulinngitsoorneq takussaanerusarpoq akissarsiffiup nalaani weekendtini, ajoraluartumik, Ippiarsummi pisortaq oqarpoq.

AAMMA ATUARUK Sulisut takkuttuartut bonusisisalissapput

Sulisut nuannaarutigaat 

Sulisut akissaatitigut atugaannik pitsanngorsaaneq oktoberip aallaqqaatani atuutilersoq Ippiarsummi errorsisartup Pilunnguaq Klosterip nuannaarutigaa:
- Kiisami. Arlaat kiisami kommunemiit imalunniit aqutsisut annerit kiisami arlaatigut isiginnissimapput toqqaannartumik sulisuminnut soqutiginnipput.

Tatiginassutsimut tapisiaqartitsineq sulisunut 150-inut misiliutigineqarpoq. Tassa sulisunut suliartortuaannartunut.

Isumaqatigiissut aappaagu martsip tungaanut atuuppoq, taamanikkussamullu nalilersorneqarumaarluni.