Sermersooq: Sulisut takkuttuartut bonusisisalissapput

Kommunimi utoqqarnik sullissisut akornanni suliartunngitsoortut amerlavallaarput. Taamaamamt Kommuneqarfik Sermersooq sulisut sulilatortuartuaannartut akilerneqartalernissaannik SIK isumaqatigiissuteqarfigaa.
Assi © : Kommuneqarfik Sermersooq
oktobarip 11-at 2017 13:45
Nutserisoq Simon Uldum -

Sulisut sulinngitsoortanngitsut 1.000 koruuninik akissarsiamik qaavisigut akilerneqartalissapput:

- Utoqqaat illuini sulisugut peqanngittarnerat annertoorujussuugami, Kommuneqarfik Sermersuumi isumaginninnermut suliffeqarnermullu ataatsimiititami siulittaasoq, Charlotte Ludvigsen, oqarpoq.


Taamaammat kommunip ingerlatsiviata tatiginassutsimut tapisiaqartitsinissamik taasaq pillugu sulinermik inuussutissarsiuteqartut kattuffiat SIK isumaqatigiissuteqarfigaa, sulisut napparsimallutik sulinngitsoorsimanngitsut immikkut akilerneqartartussanngorlugit.

Marlunnik immikkoortortalik 


Isumaqatigiissut marlunnik immikkoortortaqarpoq - tatiginassutsimut tapisiaqartitsineq aamma immikkut bonuseqartitsineq. Tatiginassutsimut tapisiaqartitsinermi sulisut qaammammut ullunik marlunnik ikinnerusunilluunniit napparsimaffeqarsimasut akunnermut 2 koruuninik tapisiaqartinneqassapput.

AAMMA ATUARUK Suleqatit napparsimakulasoqartarneranit eqqugaasartut

Sulisorlu qaammat ilivitsoq ullunik napparsimaffeqarani sulisimappat, taava immikkut bonuseqartinneqassaaq, taamaalillunilu akissarsiami qaavisigut 1.000 koruuninik akilerneqarluni. 

Tatiginassutsimut isumaqatigiissut kikkunnut atuuppa:

  • Isumaqatigiissut utoqqarnut sullissisunut 150-it missaanniittunut atuuttoq, Kommuneqarfik Sermersuup ingerlatitsiviata KNR-imut nalunaarutigaa.
  • Akunnermusiallit qaammammusiallillu isumaqatigiissummi ilaapput.
  • Qaammamusiallit napparsimanermi akissarsiaqartarput, akunnermusiallilli akissarsiaqarsinnaanngitsut
  • Akunnermusiallit napparsimallutik nalunaaraangata vikarissarsiorneq pisariaqalersarmat kommunimut sulinaqutaasoq, ingerlatsiviup oqaatigaa. Taamaattoqartillugu sulisut sulereersut qaangiuttoorlutik suliasariaqartarput, taamaammallu qaangiuttoornersisussanngorlutik.

 
Kommuni taamatut aaqqissuussinermigut sulisunik napparsimalersunik assigiinngisitsinngitsoq, Charlotte Ludvigsen erseqqissaavoq oqarluni, sulisut arlaannaalluunniit aningaasatigut annaasaqarfiginavianngitsut. Suliartortuaannartulliuku bonuseqartinneqassasut.

AAMMA ATUARUK Sermersuup atuarfiini ilinniartitsisut napparsimallutik sulinngitsuukulasut

Sulisut amerlanerusut takkutissapput
Sulisut napparsimagaluarlutik suliartortarnissaat siunertaanngitsoq naqissuserpaa. Taamatulli isumaqatigiissuteqarnikkut sulisut amerlanerusut takkuttarnissaat kommunip angorusuppaa:
Tasssalu sulisut takkutinngitsoornerisigut sulisussaaleqisarnikkut utoqqaat sullinneqarnerisa ajorseriannginnissaa anguniarpaa.

  - Akissarsinerup nalaani sulinngitsoortartut annertoorujussuugamik, taamaasilluta misiliutigaarput taamatut aaqqissuussilluta, Charlotte Ludvigsen oqarpoq.
 
Kommuni suliffeqarfiup iluani nakkutilliinermut atatillugu siorna ukiakkut nalunaarusiorpoq. Kommunip utoqqarnik sullissinerata iluani sulisut ullut tamarluinnaasa agguaqatigiissillugit qulit napparsimallutik sulinngitsoortarput, akissarsiffimmilu napparsimallutik nalunaartut agguaqatigiissillugit ullormut 25-usartut.