Qulaarpaa Qaasuitsup kommunia kommuninut pingasunut avinniarpaa

Inuit Ataqatigiinneersoq naapertorlugu ajornartorsiutit ilagaat kommunimi innuttaasut avannaaniittut illoqarfimmilu pingaarnermi Ilulissani innuttaasut akornanni isumaqatigiinnginnerat.

Taamaammat kommunip avinneqarnissaa aaqqiissutissat pitsaanersarissavaat.

- Qaasuitsup kommuninngornerata kingorna Ilulissanut isiginninneq sakkortoorujussuunikuuvoq, isumaqataanngittoqarluni annertuumik, maannakkumullu aamma nipi allanngorsimanngilluinnartoq tusaasinnaavara.

Bendt B. Kristiansen, Inuit Ataqatigiit sinnerlugit Qaasuitsup Kommuniani kommunalbestyrelsimi ilaasortaq taama oqarpoq.

Kommunalbestyrelsip siunnersuutigaa Qaasuitsup Kommunia marlunngorlugu avinneqassasoq, Aasiaat siunissami kisimiilluni kommuninngortillugu.

Aamma atuaruk Qulaarpaa Inuit ataasiakkaat sunniuteqarsinnaanerat kommunerujussuit nukittorsarpaat

Bendt B. Kristiansenili naapertorlugu kommunip avannarpasinnerusortaa, Uummannamit Qaanaamut, immikkut kommuniusariaqarpoq.    

Imaanngitsoq kommunip pingasunngorlugu aggulunneqarnissaa aaqqiissutissat pingaarnersarigaat, kisianni:

- Innuttaasuni iluatsinngittutut nalilerneqarpoq, kissaatigineqarlunilu allatut ilusilimmik aaqqissuusseqqissasugut, taannalu aamma tusaatissatut tigullugu aaqqissuusseqqinneq nutaaq ingerlattariaqarpoq, Bent B. Kristiansen oqarpoq.

Kukkunersiuinermik siunnersuinermillu suliffeqarfiup BDO-p nalunaarusiaa naapertorlugu marloqiusamik allaffissortoqalerpat ukiumi siullermi 15 millionit koruuninik ikinnerpaamillu ukiuni tulliuttuni ukiumut 10 millionit koruuninik akeqassaaq.

Aamma atuaruk Qulaarpaa Ilulissat narrugineqarpoq

Kommunillu pingasunngorlugu aggulunneqarnissaa suli akisunerussasoq Bent B. Kristiansenip ilisimavaa.

- Periuseq siulleq iluatsinngippat, periusip aappaa innuttaasut naammagisaat atorusutaallu nassaariniartariaqarpoq, Bent B. Kristiansen oqarpoq.

Millioninillu suli amerlanerusunik akeqarnissaanut kikkut akiliisussaassanersut apeqqutaassaaq.

- Kommunit Namminersorlutillu Oqartussat suleqatigiillutik taanna nassaarisariaqaraat isumaqarpunga, Namminersorlutillu Oqartussanit akileeqataanissaq avaqqunneqarsinnaanngittutut isiginarpoq, Bent B. Kristiansen oqarpoq.

KNR-imit Qulaarpaa sisamanngorpat unnukkut aallakaatinneqarpat, avannaata kommuniata avinneqarnissaa sammineqassaaq. Nalunaaqutaq unnukkut arfineq pingasunut aallakaatitassaq malinnaaffiuk.