Assi: FLICKR/Kate Bum

Qulaarpaa Ilulissat narrugineqarpoq

Qaasuitsup Kommunia avinneqassappat illoqarfiit ilaasa Ilulissat kommuneqatigerusunngilaat. Ilulissat imminut pingaartittutut salliutittarnera isornartorsiorpaat

- Ilulissaninngaanniit aqunneqarnerput kipiluttunartorujussuanngorsimavoq, taamaammat avinneqarnissappat Qaanaaq Upernavik Uummannarlu toqqassagaluarpakka, Arnaq Jørgensen, Upernavimmi innuttaasoq oqarpoq.

Upernavimmioqataatalu ilalerpaa.

- Uagut avannaani inooqataasugut tutsuiginartumik qinikkaniik pineqarnissarput kissaatigigaluarparput. Tamat oqartussaaqataanerasa iluanni  taamatut pineqanngikkaangatta qulaaninngaanniillu sukumiisumik tusaaniarfigineqarsimanngikkaangatta taaseqataagaluaraangattaluunniit ataqqinassuserput pigitinneqarani uagutsinnut akisuallaartarpoq. Taamaammat innuttaasut kissaatigisarput Uummannaq, Upernavik Qaanaarlu kommuninngornissarput sulissutigivarput, Aqqaluk Heilmann, Upernavimmi innuttaasoq oqarpoq.

Taakkulu kisimiinngilaq. Uummannarmiut aamma Ilulissat kommuneqatigerusunngilaat. 

- Kommunalbestyrelseip kissaatigisimasaa ilulissaninngaanniit avannamut Qaanaaq tikillugu avittoqarnissaa maani uummannami kissaatigineqanngilaq. Kissaatigineqartoq unaavoq Uummannaq, Upernavik Qaanaarlu kommuneqatigiissasut.  Tamatuma kingunerissavaa isorliunerusutut inissisimanermi atukkat ineriartupiloornermi kissaateqanngitsut, ukiunut malinnaaruusaarnermik innuttaasut kissaateqarnerat patajaallisassallugu pitsanngoriartuaartissallugulu. 
Pingaaruteqarpoq massakkut innuttaasut tunulliunneqartutut misigisarnerat qaangissallugu, Iisaakassak Hammond oqarpoq.

Naak Kangaatsiarmiut Ilulissat kommuneqatigisussaanngikkaluarlugu, upernavimmiut uumannarmiullu narrunerat paasisinnaavai.

- Misiginneqatigisinnaavakka, Qaasuitsup Kommuninngornerani kommuneqatigigaluarlugit, kisianni Ilulissat avataani najugaqartuulluni misiginarami Ilulissani ineriartorneq annertoorujussuusoq, uagullu illoqarfiit kommunimi ilaagaluartugut ineriartortinneqarata, Sussi Kangaatsiami innuttaasoq oqarpoq, nangillunilu.

- Misigisimanarluni Ilulissat kisiat ineriartortinneqartoq. Uagut mikinerniittugut uninngalluta tunulliunneqartarluta.

Taamaattumillu Kangaatsiami innuttaasut Ilulissat kommuneqatigisussaannginnamikku nuannariinnarpaat.

- Ajorinngilara Ilulissat kommuneqatiginnginnissaa, tamatta kommunip iluani assigiimmik pingaaruteqartussaagatta. Sussi oqarpoq.

Qaasuitsulli avinneqarnissaanut siunnersuut suli Inatsisartuni oqaluuserineqanngilaq, Ilulissat kommuneqatigilissagaluarunikku Kangaatsiarmiut piumasaqaateqarusupput.

- Ilulissat kommuneqatigissagaluarutsigu piumaqassagaluarparput mikinerugaluarluta Ilulissatulli  salliutinneqassalluta, illoqarfittut taakkutulli naleqaratta akileraartarlutalu, Sussi oqarpoq.

Qaasuitsup Kommuniata avinneqarnissaa Inatsisartuni ilaasortat oktoberip 13-ani siullermeerlugu oqaluuserissavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!