Bankimi pisortaq: Sinneqartooruteqartariaqaraluarpoq
Nunatta aningaasarsiornikkut iluatsitsinerujartoraluarluni aappaagumut aningaasanut inatsit 56,8 millionit koruuninik amigartoorfiusussaavoq.
Grønlandsbankenip pisortaata Martin Kviesgaardip tamanna iluarinngilaa. Aningaasanut inatsit Sulisitsisunit, GE-mit, aamma isornartorsiorneqarpoq. Ajornartorsiutit qitiusut sammineqanngitsut taakku isumaqarput.
Aappaagumut aningaasanut inatsit aningaasaqarnermut professorimit, aningaasaqarnermullu siunnersuisoqatigiit siulittaasuannit, Torben M. Andersenimit marlunngormat isornartorsiorneqarpoq.
Aamma atuaruk Aningaasanut inatsit professorimit isornartorsiorneqarpoq
Grønlandsbankenimilu pisortaq Martin Kviesgaard aningaasanut inatsisip amigartooruteqarfiunissaanut ernumassuteqarluni ullumi oqarpoq.
Aningaasarsiorluarnermi amigartoorutit
Piffissarmi amigartooruteqarfiusussaq Nunatta aningaasarsiornerani iluatsitsinerujartorfiusumi pisussaasoq, Kviesgaardip ersersinniarpaa.
- Ernumalaarpugut. Ukiuni aningaasarsiornikkut naliginnaasumik atugaqarfiusuni, 16-itut 17-itullu ittuni, amigartooruteqarnissaq naleqqutinngitsoq uagut isumaqarpugut, Martin Kviesgaard oqarpoq.
Sulisitsisut aamma iluarinninngillat.
- Ajornartorsiutimmi qitiusut aningaasanut inatsimmi sammineqanngillat. Aaqqissuusseqqinnissat ingerlariaqqinnissatsinnut pingaaruteqarluinnartut aallartinneqanngillat, Sulisitsisuni siunnersorti Thomas Mogensen oqarpoq.
Aamma atuaruk Aningaasanut inatsit Naalakkersuisoqatigiit isumaqatigissuteqarnerisigut akuerineqarpoq
Akitsuutit pinngitsoortinneqarsinnaagaluartut
Naalakkersuisut aningaassanut inatsimmi amigartoorutit ikilisinniarlugit nioqqutissanik assigiinngitsunik akitsuusiipput. Aaqqissuusseqqinnerit pimoorunnerullugit suliarineqarsimasuuppata tamanna pinngitsoortinneqarsinnaagaluartoq, Martin Kviesgaard isumaqarpoq.
- Nioqqutissanik akitsuusiinerit aaqqissuusseqqinnerit inissilluannginnerannit pisuupput. Tassami aaqqissuusseqqinnernit isertitaasussaagaluit allatut matussuserneqartariaqarput, Martin Kviesgaard oqarpoq.
Aaqqissuussiqqinnerit kimeerukkiartortut
Naalakkersuisulli aaqqissuusseqqinnissamut suliat aallartisarpaat, Martin Kviesgaardillu utoqqalinersiutisiaqarnissamut, siusinaarlunilu pensionisianut aaqqissuusseqqinnerit nuannaarutigigaluarlugit, aaqqissuusseqqinnerit suliarineqarnerminni kimeerukkiartortartut oqaatigaa.
- Aaqqissuusseqqinnissat suliarineqaraangata soorlumi kimeerukkiartunngikkunik, kinguartinneqartartut. Taamaalillunilu aningaasaqarnermut ajornartorsiutit iluarsineqarneq ajorput, Martin Kviesgaard oqarpoq.
Inuussutissarsiorneq siuarsartinneqarusottoq
Martin Kviesgaardip aaqqissuusseqqinnerit sorliit Naalakkersuisunit salliutinneqassanersut nalileerusunngilaq.
Sulisitsisuniilli inuussutissarsiornerup siuarsarnissaanik kaammattuuteqartut, Thomas Mogensen oqarpoq.
Aningaasanut inatsimmut isornartorsiutit aningaasaqarnermut naalakkersuisumut Vittus Qujaukitsumut akitinniarlugit attaviginiarsaraarput.
Aamma atuaruk Nunatsinni ineriartortoqarnissaa Vittup takusinnaanerarpaa