AUL-ip siunissaa nalunartoqartoq

Sarfaq Ittuk ukiormanna angalanerup nalliuteruttorfiani siornamut naleqqiullugu 1000-inik amerlanerusunik ilaasoqarsimavoq.  

- Ukiormanna ajorisassaanngilaq. Takornariat nunanit allaneersut amerlanerusimapput tamannalu aamma Arctic Umiaq Linemut soorunami sunniuteqarpoq, pisortaq Jette Larsen taama oqarpoq.

Angalasunut nunaqavissunut tamanna pitsaasuusoq nassuiaavoq. Takornariammi ininik akisunernik pisisarput, inillu ammaannartut nunaqavissorpassuit atorusunnerusagaasa akii taamaalillutik akikinnerulersissinnaallugit.

2016-ip tungaannaanut qularnaarinnittoq

Umiarsuaatileqatigiiffiulli namminersorlutik oqartussanit pigineqartup siunissaa nalunartoqarpoq, amigartooruteqarnissamummi qularnaveeqquserneqarani ingerlasussaavoq umiarsualivimmiinnermullu akileraarutit ajornartorsiutigileratarsinnaallugit.

- Sullitatsinnut oqaatigaarput 2016-ip kingorna qularnaarsimanatigu, amigartooruteqarnissamummi qularnaveeqquserneqarnerput ukioq taanna atorunnaartussaammat, Larsen oqarpoq.

Amigartooruteqarnissamut qularnaveeqqusiinerup sivitsuiffigineqarnissaa sulissutigineqarpoq, sulili angusaqartoqarani. Arctic Umiaq Line siorna 10 millionit koruuninik amigartooruteqarpoq, tamannalu amigartooruteqarnissamut qularnaveeqqutinik matussuserneqarluni.

Tamatuma saniatigut umiarsualivimmiinnermut akileraarutit nutaat, minnerungitsumik Nuummi umiarsualivittaassap Sikukip pilersaarutigisai unammillerneqartoqarsinnaapput. Aningaasanik isaatitsisoqartariaqarpoq, Jette Larsenillu talittarfeqarneq pitsaanerusoq qilanaarigaluaraa, akileraarusiinissaq Arctic Umiaq Linemut ajorluinnartumik kinguneqartitseratarsinnaavoq.

Akisunerpaaffissani anguleraa

Umiarsuaatileqatigiiffimmut ajornartorsiutaasoq tassaavoq amigartoorutit akileraarutilluunniit nutaat nammineerluni aningaasalersorniassagunigit aningaasanik aallerfissaqartariaqarami, tamannalu bilitsit akitsornissaannik isumaqarpoq. Taamatulli aaqqiissuteqarnissaaq Larsenip ilimaginngilaa.

- Isumaqarpunga pitsaanerussasoq sinersorani allanik suliaqaannaraanni. Akimmi qaffakkutsigit timmisartumut ilaanermut akit assigilissavaat, tamannalu angorusunngilarput, pisortaq oqarpoq.

Erseqqissaatigaalu umiarsuarmut ilaaneq timmisartumut ilaanermit akikinnerunngippat, taava umiarsuarneq nunaqavissunit soqutigineqarunnaassasoq.

- Nunaqavissut uagut atorluta angalarusunnerat Arctic Umiaq Linemi toqqammavigaarput, Jette Larsen oqarpoq.