AWG2016 AWG2016-ip pilersaarutai sila pissutigalugu kinguartinneqartut
Danmarkimi silasiorfiup DMI-p arfininngorpat anorersuarnissaanik ilimasaaruteqarnerata kingunerisaanik Kangerlussuarmut Nuummullu angalanissat allanngortinneqarnissapput, AWG2016-illi allattoqarfia, Air Greenland Issittumilu Sakkutooqarfik arlaatigut iluarsiinissamik piareersimapput.
- Nunatsinni pisarnitsitut maanna pissaagut. Silap unammilleraangatigut iluarsiissutissanik nassaartarpugut ataatsimoorlutalu iluarseeqatigiittarluta. Takoreerparput ulluni kingullerni kajumissutsiminnik suleqataasut ikioqqugaangatta qanoq tapersersortigineraatigut aamma ilimagilluinnarparput inuit tapersersussagaatigut tamannalu suliassaq iluatsikkumaarlutigu, AWG2016-imi pisortaq Maliina Abelsen tusagassiorfinnut nalunaaruteqarluni taama allappoq.
Ammaanersiornermut peqataanngitsuulersut
Tikittussat angalanissaat kinguartinneqarpoq, hockeymik unammisartut taamaalillutik ammaanersiornermut peqataasinnaajunnaarput ammaanersiornissarlu sapaatiuppat nal. 20.00-imut kinguartinneqarluni. Timersornikkut pilersaarutit annikitsuinnarmik kinguartitsiffiupput.
- Sila nalagaaffiginngilarput aamma sila pillugu allannguuteqartoqarsinnaasoq nalunngittuaannarparput, taamaammat pisoq malinnaaffigilluinnarparput. Massakkut pilersaarummik nutaamik suliaqarpugut, suliaqartullu tamarmik pilersaarusiaq nutaaq pilersinniarlugu sulilluartut nuanneqaaq, pisortaq Maliina Abelsen taama oqarpoq.
- Ataasinngormalli silassat assigiinngitsut malinnaaffigilerpagut, silassallu assigiinngitsut najoqqutaralugit, takutippaallu aqagu ullukkumit arfininngornerlu ulloq tamakkipajaarlugu anorersuarniartoq nittaallamillu ersigunnaarniartoq. Tamanna isumaqarpoq, massakkut nutaamik angallassinermut pilersaarusiortariaqalersimasugut, pilersaarullu Arctic Winter Games 2016-imut ajunnginnerpaamik kinguneqartussamik inerneqassaaq,Niels Chemnitz Frederiksen, Manager for Flight Operations, taama oqarpoq.
