Politikki Avatangiisit

URANI Urani pillugu innuttaasunik taasititsiniartoqarnera Avatap nuannaarutigaa

Nunatta uranimik tunisassiorsinnaanissaa pillugu innuttaasut taasitinneqarnissaanut partiip naalakkersuisoqatigiinneersup Atassutip innersuussutigimmagu avatangiisit pillugit suliniaqatigiiffiup Avattap nuannaarutigaa.

Avattap qinersisartut qinersinerminni Nunatta uranimut politikkia eqqaamaqquaa.

Allattoq Inge S. Rasmussen

februaarip 11-at 2016 03:29

Nutserisoq Mads Lynge

Aatsitassat qinngornernik ulorianartortallit piiaarniarneqarnerat Avattap isumakulunnartoqartippaa, pingaartumik piaanermi igitakut passunneqarnerannut tunngatillugu isumakuluuteqarluni.

Aamma atuaruk Urani pillugu taasisitsisoqassanersoq apeqqutigineqarpoq

Kuannersuarnut kisimi aamma tunnganngilaq, kisiani sinerissami qinngornernik ulorianartortallit allat aamma ernummatigineqarput.

- Piniariartarfitta, aalisariartarfitta nunaateqarfittalu mingutsinneqarnissaat ernummatigaavut, Avataq oqarpoq.

Aatsitassarsioqatigiiffiup Greenland Minerals and Energyp piiaanissamut qinnuteqaammut atatillugu, ingerlatseqatigiiffiup inatsisitigut pisussaaffittut inuiaqatigiinni piujuartitsinissaq pillugu nalilersuineri, VSB-mik taaneqartartut avatangiisinullu sunniutaasussanik nalilersuinerit, VVM-imik taaneqartartut nassiussimavai. Paasissutissat Kuannersuarni piaalersinnaanissamut akuersissumik tunngaviliisussat.

Aamma atuaruk VIDEO Randi: Urani pillugu isumaqatigiissut pingaartorujussuuvoq

Innuttaasulli uranisiortoqarsinnaanissaa pillugu taasitinneqassappata, Kuannersuarni piiaalersinnaanissamut qinnuteqaat pillugu suliaq unitsikkallarneqartariaqartoq Avataq isumaqarpoq.