Avannaata Qimussersui kommunekkaartumik unamminernik taarserallarput

Nuna tamakkerlugu qimussimik sukkaniunneq ukiormanna pissanngilaq. Taarsiullugu kommunekkaartumi sukkaniunnerit pisussanngorput.

Kommunekkaartumik sukkaniunnissanut KNQKp qinnuteqaataa corona pillugu allattoqarfimmit akuerineqarpoq. Taamaasilluni sukkaniunnerit martsip naanerani apriilillu aallartilaarnera pisussanngorput.

KNQK-mi siulittaasoq Johan Olsen KNR-mut ilisimatitsivoq peqatigiiffiup kissaatigeqqaarsimagaluaraa nuna tamakkerlugu sukkaniunnisaq. Kommuneniilli assigiinngitsuniit peqataasoqarluni aaqqissuussinissamut immikkut akuersisoqarsinnaanngilaq.

AAMMA ATUARUK Corona tuniluutsinnaversaarniarlugu Avannaata Qimussersua taamaatiinnarpaat

- Sisamanngornermi unnukkut ataatsimiinnitsinni aalajangiupparput sukkaniunnerit kommunekkaartumik pissasut, Johan Olsen oqarpoq.

Nuna tamakkerlugu sukkaniunnissaagaluaq qimuttunik qimmeqarfinnit tamanit peqataaffigineqartussaagaluarpoq taamalu taaguteqarluni Avannaata Qimussersui.

Pilersaarutit malillugit peqataasut tunumiit, avanersuarmiit kitaanilu qimmeqarfinniit aggertussaagaluarput.

AAMMA ATUARUK Avannaata Qimussersua aappaagu annertunerussaaq

Qimussertartulli kommunekkaartumik sukkaniunneq naammagiinnartariaqalerpaat taakkulu pinissaat ullulerneqarpoq.

Ilulissani qimussit avanersuarmiit Ilulissat tikillugit martsip 27-at sukkaniutissapput.

Kommune Qeqertalimmiut Qasigiannguani martsip 30-at sukkatiutissapput Qeqqata Kommunianeersut Sisimiuni apriiip qulingat sukkaniutissasut.

Tunumiut Kulusumi martsip 20-at sukkaniutissapput.

Najuussinnaasut killeqassapput malittarisassat maanna atuuttut najoqqutaralugit. Tassa illup iluani aaqqissuussani amerlanerpaamik 100-sinnaapput silamilu amerlanerpaamik 250-sinnaallutik.

- Paasititsiniaanissaq suliassaraarput qulakkeerniarlugu aaqqissuussat malittarisassat malillugit pinissaat, Johan Olsen oqarpoq.