Avannaata Qimussersua aappaagu annertunerussaaq

Kalaallit Nunaanni qimussertartut kattuffiata KNQKp ataatsimeersuarnerani siorna oktoberimi aalajangiunneqarpoq Avannaata Qimussersua maanna tulliuttoq pisarnermit annertunerussasoq.

- Avannaata Qimussersuata sumiiffissaa qanorlu annertutiginissaa ataatsimeersuarnermi aalajangersarneqartarpoq taamalu imaasiallaannaq tamanna allanngortinneqarsinnaanani, KNQK-mi siulittaasoq Johan Olsen KNR-mut oqarpoq.

AAMMA ATUARUK Corona tuniluutsinnaversaarniarlugu Avannaata Qimussersua taamaatiinnarpaat

Aappaagu Avannaata Qimussersuani peqataasussat nutaat tassaapput Upernavimmiut, avanersuarmiut aamma tunumiut. Taakkulu saniatigut sumiiffiit Avannaata Qimussersuani peqataatitaqartareersut peqataassapput. Avanersuarmiut tunumiullu peqataajartortarnissaat ukiut pingasukkaarlugit pisartussanngorpoq.

Sukkaniunnermi Ilulissani aallartarfiusoq qimussit 40-t missaanniileraangata sanimut ulikkaartarpoq. Aappaagulu Avannaata Qimussersuani peqataasussat tamarmik apuutissappata qimussit 40-nit amerlanerusut peqataassapput.

Suliarujussuaq

- Sukkaniunnerit malittarisassat ataatsimeersuarnermi aalajangersakkat malillugit pisarput. Malittarisassatigut periarfissaareerpoq ataatsikkut aallanngikkaluarluni sukkaniunnissaq taarsiullugulu piffissalersorlu sukkaniuttoqarluni, Johan Olsen nassuiaavoq.

- Piffissalersuilluni Avannaata Qimussersuani sukkaniunneq misilinnikuuarput ukiut ilaanni aputaasaluni sukkaniuffik sermiinnaallarmat. Sukkaniuteqataasut aamma iluarisimaarpaat ilaruttoornissamut tamanna ernumanannginnerummat, Johan Olsen oqarpoq.

Aappaagu Avannaata Qimussersuanik aaqqissuisussat piareersarlutik aallartittussanngorput.

- Suliarujussuaq naammassineqartussaavoq. Unnuiffissat, qimmerpassuit inissiffissaat unnukkullu pisartussat piareersarneqartussaammata. Aaqqissuisussat maanna aallartereertariaqarput, Johan Olsen oqarpoq.

Avannaata Qimussersua landskarsimit, kommunenit aningaasaliisartunillu aningaasatigut tapiiffigineqartarpoq.