VIDEO Avannaata Qimussersua aningaasassaaleqivoq

- Amigaatigisarput 900.000 imaluunniit millionip missaaniittoq, allamik saaffissaqanngilagut, nunatta karsiminngaanniit taanna matuneqarnissaa oqariartuutigivarput, Mikkel Jeremiassen KNQK-mi siulittaasoq KNR-imut oqarpoq.

Avannaata Qimussersua qimuttoqarfinnit tamanit peqataaffigitinniarneqartarpoq. Taamaattumillu aningaasat ikittuunngitsut pisariaqartinneqartarlutik.

- Ullumikkut nammataqarnerpaavoq Qaasuitsup Kommunia, taassuma 2 million tungaanut Qimussersuarmut aningaasartuutigisinnaasarpai, Mikkel Jeremiassen nassuiaavoq.

Allaniilli aamma aningaasaliisoqartarpoq.

- Aki timmisartortitseqatigiinniit pissarsiareqqammigarput najoqqutaralugu 3,5 millionit missaaniippoq, kisianni aningaasaliisutut inissinnermikkut 1 million missarluinnaanik akikillisaallutik, taamaalilluni 2,5 million koruuneqassalluni. Tassanngaanniit kommunit ilaa akilissavaat, ullumikkut tapeeriaaseq malillugu. KNQK-mi siulittaasoq KNR-imut oqarpoq.

Aningaasaliissutigineqartussallu tamarluinnai katikkaluaraanni suli ikinnerpaamik 1 million koruunit missaat pisariaqartinneqarmata Kultureqarnermut Naalakkersuisumut immikkut aningaasaliisoqarnissaanik noqqaassuteqartoqarpoq.

- Avannaata Qimussersua inuiaqatigiinni pingaarutilittut isigigatsigu Inatsisartunit immikkut ittumik akuerineqarnikuuvoq tassungarpiaq aaqqissuussamut aningaasaliisoqartassasoq 250.000 koruuninik aningaasartalimmik, Kultureqarnermut Naalakkersuisoq Nivi Olsen KNR-imut oqarpoq.

- Taassuma saniatigut periarfissaqarput ingerlatsinermut aningaasanik pissarsissallutik, katillugit nunatta karsianinngaanniit 500.000 koruunit pallillugit aningaasaliiffigineqarsinnaapput, Kultureqarnermut Naalakkersuisoq nassuiaavoq.

Aningaasalli pisariaqartinneqartut tamakkerlugit pissarsiarisinnaanissaat suli qularnarpoq.

- Ajornerpaamik kinguneqassappat, kingunerisassaa tassaassaaq ukioq manna Qimussersuaqanngitsooratarsinnaanera, KNQK-mit KNR-mut oqarput.