Avannaani Tunumilu piniartut aalisartullu ajunaarnersuaqarnerani ikiorsiissutinik tunineqassasut
Aalisartut, piniartut savaatillillu inuussutissarsiorsinnaanerat silap pissusaata allanngoriartorneranit sunerneqartoq ajunaarnersuaqarnerani ikiorsiissusitinik tunineqarnissaminnut decembarimi qinnuteqarsinnaalerput.
Qaanaami nunaqarfinniilu taavalu Tunumi aalisartut piniartullu immap sikuunnginnera pissutigalugu aningaasarsiorsinnaanngimmata, aaqqissuussaq ukiortaap kingorna atuutilertussaagaluartoq decembarimi atuutilerpoq.
Aalisartut piniartullu juullinnginnerani ikiorsiissutinik tunineqarnissaminnik naatsorsuuteqaraluarlutik ikiorsiissutinik juullinnginnerani tunineqanngillat.
Sullissineq sivisummat, ikiorsiissutinik qinnuteqartut naammagittarniarsarisariaqarsimapput.
Ilaatigut KNAPK-p tamanna pakatsissutigaa.
Maannakkulli akissutissarsisoqarpoq. Qaanaami nunaqarfiinilu Ittoqqortoormiinilu piniartut aalisartullu 75-it aningaasanik ikiorsiissutinik 15.000 koruuninik ataatsikkut tigusassanik tunineqarnissaat maanna akuersissutigineqareerpoq.
Aalisarnermut piniarnermullu naalakkersuisoqarfik tusagassiorfinnut nalunaarummi taama allappoq.
Naalakkersuisut januaarip tallimaanni qinnuteqaataat Inatsisartut aningaasaqarnermut akileraartarnermullu ataatsimiitsitaliaannit akuerineqartoq, tassani atuarneqarsinnaavoq.
- Naalakkersuisut kissaatigaat Inatsisartut Aningaasaqarnermut Akileraartarnermullu Ataatsimiitsitaliap akuerissagaa ikorsiineq decembarimili aallartinneqassasoq, januaarip aallaqqaataa 2024 atuutilerfissatut utaqqeqqaanngikkaluarlugu, naalakkersuisoqarfik allappoq.
Ikiorsiissutit ataatsikkut tigusassat piniartunut aalisartunullu ikiorsiissutisinissamik qinnuteqarsimasunut tamanut tunniunneqassapput.
3 millionit koruunit
Silap kissatsikkiartornera silapiluttarneralu innuttaasorpassuarnut pinngortitami sulisartunut inuussuteqartunullu isumaqangaatsiarpoq.
Taamaammat aalisartut, piniartut savaatillillu siunissami silap pissusiata allanngoriartornera pissutigalugu ajunaarnersuartut ittumik pisoqassagaluarpat imaluunniit silap qanoq inneranit aningaasarsiorsinnaanerat eqqugaassagaluarpat ikiorsiissutinik qinnuteqarfigisinnaasaminnik pilersitsisoqarnissaa ujartornikuuaat.
Inatsisartunimi amerlanerussuteqartut siunnersuut naalakkersuisunut inatsimmik atuuttumik allanngortitsisussanngortitsisussaq oktobarip 24-ani akueraat, taamaalillutik inuussutissarsiutigalugu aalisarnermik piniarnermillu inuussutissarsiuteqartut assersuutigalugu ajunaarnersuaqassagaluarpat imaluunniit ajutoortoqassagaluarpat pilersitseqqinnissamut tapiissuteqarfigineqarsinnaalissallutik.
Pinasuartumik ikiorsiineq pilersitseqqinnissamut ikiorsiinermik aamma taaneqartarpoq. Immersuillutit nammineq qinnuteqarsinnaavutit.
Aningaasanut inatsimmi pilersitseqqinnissamut ikiorsiissutinut 3,052 millionit koruunit immikkoortinneqarput.
Sermitsiaq.AG-mi allaaserisaq naapertorlugu 2023-mi ulluni kingullerni qinnutigineqarsinnaasut 1 millionit koruuniupput. Nunatsinnilu sumiikkaluaruilluunniit ajunaarnersuartut ittumik pisoqarneranut ikiorsiissuteqarfigineqarnissat qinnutigisinnaavat.
Ikiorsiissutit akuerineqartumut ataasiartumik ikiorsiissutitut tunniunneqartassapput, qinnuteqartumullu ataatsimut minnerpaamik 2.000 koruunit annerpaamillu 25.000 koruunit ikiorsiissutaasinnaallutik.