Avannaani suliffissaaleqisut amerleriapiloornissaat ernumagaat
- Massakkut sukiffeqarfiit allamut nussorput suliassaaleqineq aningaasassaaleqinerlu pissutigalugu, suli taanna sakkortusissooq qularnanngitsumik, naatsorsuutigaara suliffiit pioreersut eqqorneqassasut, taamaalillunilu suliffissaaleqineq suli sakkortusissalluni, Qaasuitsup Kommuniani illuatungiliuttumi Siumumi ilaasortaq inuussutissarsiornermilu ataatsimiititaliami ilaasortaasoq Enok Sandgren taama oqarpoq.
Qaasuitsup Kommuniani suliffissaaleqisut 834-nit ikinnerunngitsut qaammat kingulleq suliffissaaleqisutut allassimasuutigineqarput. Suliffissaaleqisullu amerliartuinnassappata inunnik isumaginninnermi aningaasartuutit qaffakkiartuinnassapput:
- Taamaattumik kommuni Namminersorlutik Oqartussanut imaluunniit bankimut atornianngippat aningaasaqarneq ammut ingerlarusaartuartussaavoq, Enok Sandgren oqarpoq.
Ernumassurteqarnerli Inuit Ataqatigiinni kommunalbestyrelsimi ilaasortamit inuussutissarsiornermilu ataatsimiititaliami siulittaasumit Peter Olsenimit pissutissaqarsorineqanngilaq.
- Inatsisitigut taakku pituttugaapput suliffissaaleqinerit imaluunniit suliffissalerinermi ikiuiniarnerit taavalu aamma isumaginninnikkut isumagisariaqartut sipaarniarfigineqarsinnaanngillat, taakku ingerlaannassapput allanngornavianngillat aamma suliffissaaleqinermik akiuiniarnerput taamaaginnassaaq, eqqorneqassanngilaq, Peter Olsen taama oqarpoq.
Suliffissaaleqinerli qaffakkiartuinnassappat inunnik isumaginninnermut aningaasartuutit amerlasussaagaluartut aningaasassaaleqisoqaraluartorlu suliffissaaleqineq akiorniarneqarpoq:
-Aatsitassarsiornermut uuliasiornissamullu piareersarnerit massakkut annertuumik aallartinneqarnikuupput ingerlaartuarpulli,kommunip Namminersorlutillu Oqartussat suleqatigiinnerisigut taakku ingerlanneqarput, Peter Olsen oqarpoq.
