Atuartut timiminnik atuinermikkut ilinniarluarnerusarput
Meeqqat atuarfianni atuartut timiminnik atuinermikkut ilinniarluarnerusarput. Pinaveersaartitsinermut siunnersuisoqatigiit, Vidensråd for Forebyggelse, nalunaarusiaminni nutaami tamanna naqissuserpaat.
- Atuartut issiatiinnarlugit 5-tabelimik ilinniartiinnarnagit nikuiseriarlugit timertik atorlugu 5-tabelimik ilinniartinneqarsinnaapput. Taamaaliornikkut amerlanerit ilikkarluarsinnaapput, Nunatsinni Timersoqatigiiffiit Kattuffianni qullersaq, Carsten Olsen, oqarpoq.
Aamma atuaruk Uteqattaarluni arpanneq meeqqat atuarfianni eqeersimaartitsisarpoq
Pinaveersaartitsinermik siunnersuisoqatigiit, Vidensråd for Forebyggelse, suleqatigiissitaat naapertorlugu, misissuinerit arlallit takutippaat timimik atuineq ilikkariartortarnermut pitsaasumik angusaqarfiusartoq.
Meeqqalli amerlavallaartut uninngaannarpallaartarput, tamannalu meeqqat atuarfiini angusarisartakkanut sunniuteqartartoq, suleqatigiissitaq allappoq kaammattuutigalugulu atuartut atuarnerup nalaani ullormut minutsini 45-ni timiminnik atuisassasut.
Peqqissutsimut Ilinniartitaanermullu naalakkersuisumit misissorneqartoq
Ilinniartitaanermut naalakkersuisup Nivi Olsenip aqqut taanna aamma atorusuppaa. Peqqissutsimut naalakkersuisoq Doris Jakobsen peqatigalugu meeqqat atuarfiini atuartut timiminnik atuinerulernissaannut periarfissat misissorniarpai, kommunilli ataasiakkaat aqqut suna atorusunnerlugu aalajangigassarigaat aamma erseqqissaatigalugu.
- Ineriartornerup tassunga ingerlanissaa tapersersorparput. Nutaajunngilaq taanna paasisaq, qangali ilisimaneqarpoq. Kisianni pingaaruteqarpoq una oqaatigissallugu, ullumikkut periarfissaareerpoq kommunini meeqqat aalatinnerunissaannut tunngasumik suliaqarnissaq, Ilinniartitaanermut naalakkersuisoq oqarpoq.
Aamma atuaruk Niviarsiaqqat aalanikippallaartut
Aamma atuaruk Innuttaasut peqqissusaat pillugu nalunaarusiaq saqqummerpoq
Innuttaasut peqqissusaannik Namminersorlutik Oqartussat misissuititsinerisa 2014-imeersup Nunatsinnilu Timersoqatigiiffiit Kattuffiata misissueqqissaarinerata takutippaat innuttaasut timersorneq siusippallaartukkut unitsittaraat.
Misissuinerup aamma takutippaa nivissat 15-17-inik ukiullit 8 procentiinnaasa ullormut akunnermi ataatsimi timiminnik atuinissamik anguniakkamik naammassinnittartut. Meeqqat atuarfiini atuartitsinermi atuartut timiminnik atuisinneqartalernissaat pillugu Nunatsinni Timersoqatigiiffiit Kattuffiata Ilinniarfissuaq peqatigalugu oqaloqatigiinnerit aamma aallartissimavai.
- Ilinniartitsisut tamarmik ulluinnarni atorsinnaasaminnik sakkussarpassuaqarnissaat, tamakkuninngalu ilinniartitsisunngorniarnerminni pissarsisarnissaat anguniagaavoq, skemaannut ilanngunneqarneratigut ataasiaannartumik pinnani ukiut tamaasa pisilissagaluarmat, Carsten Olsen oqarpoq.
