Attaveqaatinik ammanerulersitsinissamut suleriaaseq isornartorsiorneqarpoq

- Isumaqarpunga taamaasiortoqarnera ajoqutissarpassuaqarpoq, ikittuinnarnilli iluaqutissaqarluni. Aamma iluaqutissaqarsorisoqartoq, naak taamaanngikkaluartoq isumaqarpunga. Tamakkiisumik sukkasuumillu ammanerulersitsisoqassappat iluaqutissat arlaqartut takusinnaaneruakka, Combyimi pisortaaneq Brian Torb oqarpoq.

Attaveqaqatigiinnerup iluani ullumi unammillertoqannginnera, taamaammallu akit nikippiarneq ajornerat, Brian Torbip aamma ersersinniarpaa.

Aamma atuaruk Unammillertip TELE kinguarsaaneraraa

Attaveqaqatigiinnermut atortut ammanerulersinneqarniarput

Attaveqatigiinnerullu iluani nutaaliortoqarsinnaagaluarpat akit apparsinnaagaluartut, inuiaqatigiillu aningaasatigut sipaaruteqarsinnaagaluartut, aningaasallu taakku ammanerulersitsinermi akiligassanut allanut atorneqarsinnaasut, Brian Torb isumaqarpoq.

- Taannali ammanerulersinneqanngippat aningaasat taakku pissarsiarineqarnavianngillat. Aningaasallu taakku annaaneqarnerisa saniatigut suleriaatsimut akornutit suli pigiinnarneqassapput, Brian Torb oqarpoq.

Aamma atuaruk Knud Kristiansen: Paasinneqqaarluta namminersortunngorsaassaagut

TELE-mi pisortaq isumaqataavoq

Attaveqaqatigiinnerup iluani ammanerulersitsisoqassappat politikkikkut aaqqitassaavoq, TELE-POST-imilu pisortaagallartoq, Søren Lennert Mortensen tassunga ilanngukkusuppallaanngilaq.

Søren Lennert Mortensenilli Brian Torbip isornartorsiutaa paasisinnaavaa.

- Isumaqatigilluinnarpara. Ammanerulersitsiniarnermut suliap ingerlateqqinnginnerani iluaqutissaasinnaasut  ajoqutaasinnaasullu pillugit misissuisoqalernera taamaammat iluaraarput, TELE-POST-imi pisortaagallartoq Søren Lennert Mortensen oqarpoq.

Aamma atuaruk Kinguartitsisoqarsinnaanera Naalakkersuisut ilisimasimavaat

Misissuisoqarniarnera nuannaarutigineqarpoq

Oqarasuaatit angallattakkanut unammilleqatigiinnermik aallartitsinnginnermi, ammanerulersitsiniarnermut tunngatillugu inuiaqatigiit aningaasaqarneranni sunniutaasinnaasunik misissueqqissaartoqassasoq, attaveqarnermut naalakkersuisoq Knud Kristiansen, Jens Erik Kirkegaardip paragraf 37 naapertorlugu apeqqutaanut akissutimini allappoq.

Tamaattoqarnissaalu Søren Lennert Mortensenip nuannaarutigaa.

- Isumassarsiatsialaasoq isumaqarpugut, tassami pingaaruteqartunik aalajangiissagaanni ilisimasat piviusut tunngavigalugit aalajangiisoqassasoq isumaqaratta. Knud Kristiansenip isummersuutaa iluaraarput, Søren Lennert Mortensen oqarpoq.

Aamma atuaruk Mobilinik atuisut internettimut akileeqataasarput