Atassut: Tarnip pissusiinik ilisimasallit atuunnerat aalajangersaaffigineqarli
Tamanna ajornartorsiutaasoq Atassummeersoq Steen Lynge isumaqarpoq, Naalakkersuisullu pissaanertik atorlugu Kalaallit Nunaanni tarnip pissusiinik ilisimasallit atuunnerat aalajangersaaffigissagaat isumaqarluni.
Tarnip pissusiinik ilisimasallit akuerineqaqqaartannginnerisa kinguneraa, kinaluunniit ilinniarsimanngikkaluarluniluunniit imminut taama taasinnaammat.
Inatsisitigut isumannaatsuuneq
Inuit namminneq privatimik tarnip pissusiinik ilisimasalinnik sullinneqarpata inatsisitigut isumannaatsuusinnaanngillat. Ullumikkummi suliassamik paasisimasaqarnissamik pitsaassutsimilluunniit piumasaqaateqartoqartanngilaq.
Aamma atuaruk Tarnip pissussanik ilisimasalinnit katsorsartittut maalaarfissaqanngillat
Pisortalli sullissiviini sullinneqarsimagaanni naammagittaalliortoqarsinnaavoq. Ilinniarsimasuunissarmi piumasaqaataavoq naammagittaalliortoqarsinnaallunilu, Steen Lyngep siunnersuunni tunngavilersorpaa.
Naalakkersuisut isumaqataapput
Naalakkersuisut Steen Lynge isumaqatigaat tarnip pissusiinillu ilisimasallit pillugit nalunaarutissap suliarineqarnera annertusiniarlugu.
Kalaallit Nunaanni nakorsaaneqarfimmi suliallit ullumikkut atorfilittat nakkutigisarigai, peqqissutsimut naalakkersuisoq Doris Jakobsen Atassummut akissummini allappoq.
- Peqqinnissaqarfiup avataani tarnip pissusiinik ilisimasallit pillugit nakkutiginnittussamik naammagittaalliorfiusinnaasumillu nassaartariaqarpugut, peqqissutsimut naalakkersuisoq oqarpoq, naatsorsuutigalugulu nalunaarut 2017-imi naammassiumaartoq.