Tarnip pissussanik ilisimasalinnit katsorsartittut maalaarfissaqanngillat

Assersuutigalugulu katsorsarneqarsimasut maalaarfissaqanngillat, tarnip pissussaanik ilisimasallit peqatigiiffiata nunatsinni immikkoortoqarfiata siulittaasua, Karen Marie Nathansen oqarpoq.

- Inatsit illit, uanga Inatsisartullu tamatta illersuutissaraarput. Kisianni inatsiseqanngilaq. Taamaammat kinguaassiutimikkut atornerlunneqarsimasut meeraanerminniluunniit sumiginnarneqarsimasut passunneqarnerminnit kingunerlutsitsigunik maalaarfissaqanngillat.

- Assersuutigitigu illit ukiup aappaa affaq passukkakkit, aallaqqaataaniit misigisatit qallorneqareersut, inuunerit artornarsiartuaartoq misigiguit, taava maalaarfissaqanngilatit. Tarnip pissusaanik ilisimasalik oqarpoq .

Tarnip pissusaanik immikkut atuarneq universitetinik ingerlanneqartarpoq, ukiunik tallimanik sivisussuseqartussatut naatsorsuussaalluni. Kisianni kinaluunniit passussisinnaavoq oqarluni, tarnip pissusaanik immikkut ilisimasaqarluni.

- Pikkorissaasartut ilaasa taaguut taanna atortarpaat, aammami kikkulluunniit atorsinnaavat.

Aamma inuttut ineriartornermik taallugu pikkorissaanerit ingerlanneqartut arlallit KNR-ip aallakaatitaasa ilaanni tusartarpavut. Peqatigiiffiummita tamakkua qanoq isumaqarfigai?

- Tarnimikkut napparsimasut assigisaallu peqataassappata imaassinnaavoq, inuup atugai suli oqimaanninngortut. Taava uagut ilaasortatta pikkorissareersimagaluartut passuteqqittariaqartarpaat, Karen Marie Nathansen oqarpoq.

Taassuma ilaqutariinnut peqqissutsimullu naalakkersuisoq Naja Petersen inatsisiliornissaq siunertaralugu januaarimi kingullermik allaffigaa, sulili akineqarani.