Arnaq Islandimiu ujaarineqarpoq
Islandimi arnaq 20-nik ukiulik sapaatip-akunnerata kingulliup naanerani periarfeerunneqarpoq sulilu ujaarineqarluni. Annaassiniartartut 500-nit amerlanerusut arnap periarfeerunneqartup ujaarineqarneranut peqataapput. Iceland Monitor taama allaaserisaqarpoq.
Arnaq 20-nik ukiulik taanna Reykjavikimi aqqusinermi pisuinnartarfimmi arfininngornermi januaarip ulluisa 14-ianni ullaakkut periarfeerunneqarpoq. Biilit aappalaartut Kia Rio-t, kilisaammi Polar Nanumi inuttanit attartorneqarsimasut aqqusernup pisuinnarfiusup eqqaani piffissap taassuma nalaani takuneqarsimapput.
Biilit iluanni aammik nassaartoqarpoq
Polar Nanumi inuttat marluk suliamut atatillugu sisamanngormat tigummigallagassanngortinneqarput, Islandimilu tusagassiuutit allaaserisaat naapertorlugit toqutsisimasutut pasineqarput.
Biilit aappalaartut Kia-mik meqqilersukkat iluanni aammik nassaartoqarsimasoq Iceland Monitorip allaaseraa, aalli arnamit periarfeerunneqarsimasumeernersoq oqaatigineqarani.
AAMMA ATUARUK To anholdte er sigtet for mord
Reykjavikimi politiit pisortaata Grimur Grimssonip oqaatigaa biilit ingerlaarfigisimasaat misissorneqarsimasut, arfininngornermili ullaakkut nalunaaqutaq arfineq-marluk aqqanillillu akornanni sukkut ingerlaarsimanersut suli misissuiffigigaat oqaatigalugu.
Arnap Islandimiup periarfeerunneqarnerata kalaallinut kilisaammi inuttanut attuumassuteqarnera saqqummiunneqarmat, kalaallit maanna Islandimiittut toqqissisimannginnerulernerannut arlaleriarluni kinguneqartitsisimavoq.
Præsidenti: Sukkavallaamik inerniliisoqassanngilaq
Arnamut periarfeerunneqartumut suliaq Islandip præsidentianit Guðni Th. Jóhannessonimit tusagassiuutinut nalunaarummi ullumi arfininnngornermi allaaserineqartoq, Iceland Monitorip allaaseraa.
Arnap periarfeerunneqartup ilaqutaanut misiginneqatiginninnini apuuppaa, arnamillu periarfeerunneqartumik ujarleqataasut hunnorujulikkaat aamma eqqaallugit. Inuilli sukkavallaamik inerniliinnginnissaat pasillerumatuujunnginnissaallu aamma kaammattuutigalugu.
AAMMA ATUARUK Qujaukitsoq tigusarinninnerit pillugit angalaniarunnaartoq
Politiillu pisortaat Grimur Grimsson nutaarsiassaqartitsivimmut RÚV-mut ima aamma oqarpoq:
- Kalaallit Nunaat suliami matumani pasineqanngilaq. Kalaallit Nunaat ikinngutitut isigaarput, taamatullu aamma pissusilersorfigissavarput, Grimur Grimsson oqarpoq.
AAMMA ATUARUK Hashimik nassaartoqarmat tigusarineqartut sisamaalersut
AAMMA ATUARUK Inuttat marluk Reykjavikkimi politiinit tigummigallarneqartussanngortut
