Arferit Issittup kianneruleriartornera iluarusuutigaat
Nunarsuup annersaata kianneruleriartorneranik nunarsuup imartai sikukilliartortut Nutaarsiassanit ukiorpassuarni oqaluttuarineqartaqaaq. Pisulli nuanninngitsut aamma nuannersunik kinguneqartarput.
Sikoqarpallaannginnerami qipoqqarnut, tikaagulliusaanut tikaagullinnullu ajunnginnerusaqaaq.
National Oceanic and Atmospheric Administrationimit, tassa Imarpissuit nunarsuullu nalaani silaannaq pillugit ilisimatuut, ilisimatusarneq pillugu tusagassiiisarfimmut New Scientistimut taama nassuiaapput. Ilisimatuut taakku Siberiap Alaskallu akornnanni Chukckip imartaaniit paasissutissanik ukiuni 30-ini kingullerneersunik paasiniaaqqissaarsimapput.
Arferillu tamakku Chukckip imartaani 1980-ikkunni takussaasimanngillat, ukiunilu kingullerni takuneqallattaarlutik. Tamannali sikukilliartortillugu uumaffigiuminarsiartorpoq.
Immami tappiorannartunik nerisaqarput
Qipoqqat, tikaagulliusaat tikaagulliillu pingaartumik immami tappiorannartunik seqinernup qaamaneranik pisariaqartitsisunik nerisaqartuupput. Sikoqartillugulu tappiorannartut seqinermit pisariaqartitaminnik pisinnaaneq ajorput. Ukiorpassuarnili kingullerni sila kianneruleriartorpoq sikorujussuarlu aalluni.
Aamma atuaruk Umiarsuit Issittukkoortalernerisigut Kangianit Europamukarneq sivikillisinneqassasoq
Tassalu tappiorannartut Issittumi amerlipiloorput. Tamannalu arferit assigiinngitsut pingasut iluaraat. Arferillu issittup imartaaniilernerulernerannut anori aamma pignaaruteqarpoq.
Imarpissuup sikuerunneratigut anorip imaq aalatinnerulertarpaa, taamaalillunilu tappiorannartut immami itinerusumeersut arferit uumaffigisaannut immap qaavanukartittarlugit.
