Arctic Winter Games tamaat Nuummiut aaqqissuussinnaavaat?
Canadami timersornermut ministerit Arctic Winter Games-inillu aaqqissuussinerni aqutsisut Alaskami Fairbanks-imi ataatsimiimmata Nuummi timersortarfiit amigaataaneri oqaluuserineqarmata Nuummi unammiuaarutissat ilaat, soorlu curling, eqaarsaarnerit, qimussimik sukkaniuunnerit, sukuutsernerit sukuutserlunilu arsaararnerit ingerlanneqarsinnaannginneri ajornartorsiutaanerangaapput.
Yukon Territoriap sinniisuata Elaine Taylorip CBC-mut oqaluttuarnera naapertorlugu Arctic Winter Games ingerlanneqaraangata tamatigut timersuutit sisamararterutingajai ilaatinngitsoorneqartuartarsimapput, tassalu timersortartut inuusuttut 400-t missaaniittut tamatigut pakatsisinneqartariaqartarsimasut.
Issittormiummi inuusuttortaasa timersuutiminnik ineriartortitsinissaannut Arctic Winter Games pingaaruteqarluinnartuuvoq, Arctic Winter Games-imilu nammiuaartarnerit unammiuaarnernit allanit pingaaruteqarneroqisut Elaine Taylor-ip ima nittarsaappaa.
- Arctic Winter Games issittup ukiuunerani Olympiadernerattut taasariaavoq, Elaine Taylor oqarpoq.
Nuummilu timersuutit ilaasa ingerlanneqarsinnaannginneri pissutaalluni aaqqiissutissat allat ujartorneqarnissaat apriilimi ataatsiminnermi oqaluuserineqassaaq, Kalaallit Nunaannilu timersuutit Nuummi ingerlanneqarsinnaanngitsut illoqarfik alla suleqatigalugu nussorneqarsinnaanersut eqqartorneqassalluni.
