Arctic Circle Race soqutigineqarluartoq

- Ukiormanna tupinnaannartumik silagissorsuuvoq, ippassaq ullumikkullu nuiatannguaqarani seqinnarissuaarpoq, kiappallaaranilu. Pitsassuuvoq, tamannalu sisorartunut ikiuuttunullu ajunngeqaaq. Rekortiliiffiusoq, aamma taanna oqaatigisariaqarpoq.

Ujakkaarlutik arpattartut marluinnaat ulloq siulleq uniinnarsimasut Arctic Circle Racemi siulittaasup Jens Klaus Lennertip aamma oqaatigaa.

Arctic Circle Race nalliuttorsiorfiuvoq, tamannalu immikkut malunnartinneqarpoq. Ujakkaarlutik arpattartut 230-t ukiormanna peqataapput, aatsaallu taamak amerlatigisunik Arctic Circle Race peqataatitaqarluni.

1997-imi ujakkaarlutik arpattartut 183-it peqataapput, taamanilu anngunniunnermi amerlanerpaasimallutik. Ukiormanna namminneq kajumissutsiminnik suleqataasut katillugit 250-iupput. Pisarnermit amerlanerungaatsiarput, nalinginnaasumimmi 150-it suleqataasarsimammata.

Soqutiginninneq ukiormanna annertunerusoq

- Nittartagarput aqqutigalugu facebookerput iserfigineqartarami. Ippassamiit sapaatip akunnera kingumut, inuit 300.000-ut facebookkerput aqqusaarsimavaat. Anngunniunnerlu tusagassiortunit soqutigineqarluarpoq. 

Tusagassiortullu nunani assigiinngitsuneersut assinik filmeeralianillu piumallutik saaffiginnittut, Jens Klaus Lennertip oqaatigaa.

Kunngissarlu Frederik arpattuni nuimanersaagaluartoq, allat assigalugit pineqassasoq isumaqatigiissutaavoq.

Aamma atuaruk Kunngissaq ACR-imullu peqataasut allat aallarluarput

- Isumaqatigiissimavugut allatulli arpaqataasutut pineqassaaq. Inuttaata aamma qularnanngitsumik iluarerpasippaa, Arctic Circle Racemi siulittaasoq Jens Klaus Lennert oqarpoq.