Anorersuaq alla ulussaarsuup Irmap aqqutigisimasaatiguussagunartoq
Qeqertarmiullu ulussaarsuarmit sakkortuumit eqqugaaqqittussanngorunarput. USA-mi ulussaarsuarnik nuna tamakkerlugu misissuisoqarfik taama ilisimatitsivoq.
Amerikamiut tv-qarfiat CNN naapertorlugu kiattup anorersui nutaat arlallit Atlantikup imartaaniipput. Pingaartumillu kiattup anorersua Maria immikkut nakkutigineqarpoq.
AAMMA ATUARUK Floridami anorersuarujussuarmat inuit ikinnerpaamik 12-it ajunaartut
Anorersuaq Maria arfininngormat pileqqaarpoq ataasinngornerullu ingerlanerani ulussaarsuannguussangatinneqarluni. Ilimasaarutigineqartullu eqquutissappata qeqertat Leward Islands ullut marluk pingasulluunniit iluanni Mariamit eqqugaasinnaapput.
Maria tamatuma kingorna Puerto Ricop, Haitip Den Dominikanske Republikkillu tungaannut illuariartussangatinneqarpoq - tassalu ulussaarsuup Irmap aqqutigisaanut assingusumik.
CNN naapertorlugu anorersuaq Maria Puerto Ricomut pingasunngorpat anngukkuni ulussaarsuarnut uuttuut malillugu 3-tut sakkortussuseqassangatinneqarpoq.
AAMMA ATUARUK Ulussaarsuaq Irma sakkukilliartorpasittoq