Assi: NASA/NOAA GOES Project

Ulussaarsuaq Irma sakkukilliartorpasittoq

International Røde Kors naapertorlugu inuit 1,2 millionit ulussaarsuarmit Irmamit eqqugaasimapput. Kisitsit taanna 26-nngorsinnaavoq.

Ulussaarsuaq Irma sakkukilliartorpasippoq ataasinngornerullu ingerlanerani kiattup anorersuannguutissangatinneqarluni.

USA-mi nuna tamakkerlugu ulussaarsuarnik misissuisoqarfik NHC taama ilimasaaruteqarpoq, nutaarsiassaqartitsivik Reuters taama allaaserisaqarpoq.

Ulussaarsuaq pillugu ilisimasat ataani atuarneqarsinnaapput:

* Irma sapaatit-akunnerata siuliani nunamut annguteqqaarpoq, qeqertaq Barbuda ulussaarsuarnut uuttuut naapertorlugu 5-imik sakkortussuseqarluni eqqorpaa, anoraa 295 km/t-itut sukkassuseqarluni.

* Kingorna qeqertat St. Martin, St. Barts aamma Anguilla, De Britiske Jomfruøer, Puerto Rico, Den Dominikanske Republik, De Amerikanske Jomfruøer (siornatigut Indiaaqqanik ateqartut, aaqq.), Haiti aamma Cuba aqqusaarpai.

* Qeqertat eqqugaanerpaasut marluusut tassaapput St. Martin aamma Barbuda. Taakkunani aseruatiternerit annertuupilussuupput innuttaasullu amerlaqisut angerlarsimaffeerupput.

* Irma Cubamut tallimanngormat anngummat inuit millionit sinneqartut qimagussortinneqareersimapput.

* Irma Floridamut sapaatiummat annguppoq ulussaarsuarnut uuttuut naapertorlugu 4-mik sakkortussuseqarluni. Inuit 6 millioninit amerlanerusut naalagaaffimmi tassani angerlarsimaffimminnik qimaguteqquneqarpoq.

Angerlarsimaffiit suliffeqarfiillu 4 millioninit amerlanerusut sapaatiummat unnukkut innaallagiaaruttoorput.

* USA-mi naalagaaffinni Georgiami, South Carolinami, Virginiami Floridamilu sukannersumik naalakkersuisoqassasoq nalunaarutigineqarpoq.

* Ulussaarsuit Irmap, Harveyillu Texasimi aggustip qaammataani pisup, kingorna iluarsartuussinissamut aningaasartuutigineqartussat  290 milliardit dollarinik naleqassangatinneqarput, taakkulu USA-mi tunisat ataatsimut nalingisa 1,5 procenterivaat.

* Ulussaarsuup Irma kinguneranik inuit ikinnerpaamik 30-t ajunaarput. Floridami maannamuugallartoq pingasut ajunaarput Caribiamilu inuit ikinnerpaamik 27-t ajunaarlutik.

* International Røde Korsip ilisimatitsissutigaa inuit 1,2 millionit ulussaarsuarmit eqqugaasimasut. Suliniaqatigiiffillu naapertorlugu eqqugaasut 27 millioninngorartarsinnaapput.

* Anorip sukkassusiata 300 km/t angusarlugu Irma Atlantikup imartaani anorersuit nalunaarsorneqartut sakkortunersarivaat.

* Ulussaarsuaq ulussaarsuarnut uuttuut naapertorlugu 5-iulluni pilerpoq sakkukilliartuinnarsimallunilu. Ataasinngornerup ullaavani ulussaarsuarnut uuttuut naapertorlugu 1-inngussangatinneqarpoq taamaalillunilu kiattup anorersuatut sakkortussuseqalissalluni.

Najoqqutarisat: AFP, BBC, Reuters, AP, CNN, The Guardian, National Hurricane Center.

/ritzau/

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!