Anna Wangenheim: Piumassuserinngisaminnik meerartaarsinnaanngitsunik ikiorsiineq pillugu sulineq ajorluinnarpoq
- Misiliutaaginnarnera ajorluinnarpoq. Meerartaarsinnaanngitsut ikiorneqarnissamut pisinnaatitaaffisa qulakkerneqarnissaat, siunnersuutip akuersissutigineqarnerani tunngavilersuutaavoq.
Aappariit piumassuserinngisaminnik meerartaarsinnaanngitsut naartulerniarnissamut Danmarkimi ikiorserneqarnissaannut millionilikkaanik ukioq manna aningaasanik immikkoortitsisoqarnera pillugu Anna Wangenheim Demokraatineersoq taama oqarpoq.
Ikiorsiisoqarnissaanut 8,7 millionit koruuninik aningaasanut inatsimmi illuartitsisoqartoq Naalakkersuisut ukioq kingulleq oqaatigaat. Aningaasanulli inatsit naammassineqarmat millionit taakku ersinngillat, susoqarsimaneralu Naalakkersuisut arlaannaataluunniit nassuiarsinnaanngilaat.
Aningaasalli nassaarineqaqqipput, ukioq mannamulli atugassat kisimik.
IVF aamma ICSI atorlugit Danmarkimi ikiorsiinissamut 3 millionit koruunit ukiup sinnerani atugassat nassaarineqarsimasut, Peqqissutsimut Naalakkersuisup Agathe Fontainip sapaatit akunnerisa marlussuit matuma siorna oqaatigaa.
Pisariaqarpallu 5,7 millionit koruunit aamma atorneqarsinnaasut, taassuma ilanngullugu oqaatigaa.
- Ajunngitsumik ingerlasoqarpat 2025-mi aningaasaqarnermut inatsimmi aalajangersimasumik tassaniittussanngorlugit ilanngunneqassapput. Peqqinnissaqarfiup iluani aningaasat affai nassaarineqarput affaalu sillimmatininngaanniit, Agathe Fontain KNR-imut oqarpoq.
Isummerfigissassatut siunnersuummik saqqummiusisoq Anna Wangenheim (D) aaqqiinermut isornartorsiuivoq.
- Inatsisartuni isummerfigisassatut saqqummiusara taama siunertaqanngilaq, taanna tikkuaavoq.
- Ataavartumik aaqqiisoqarnissaa isummerfigisassami siunertarineqarpoq, meerartaarniarnermik ajornartorsiutit siunissami minnerulernavianngimmata.
Tukattumik suliarineqartoq
Ikiorsiinerup ataavartumik aaqqiissutaajunnaarluni 2024-mi misiliutinngortinneqarnera, aappariinnut meerartaarusuttunut kingunipiloqarnissaa Anna Wangenheimip ernumassutigaa.
- Meerartaarsinnaanermut periarfissaqarnertik qularnaatsumik ilisimasinnanngilaat, taamatullu ernumassuteqaqqunanngeqaat, taanna oqarpoq nangillunilu.
- Toqqissillutik meerartaarsinnaasariaqarput.
"Partiit tamarmik" isummerfigisassamut isumaqataasimanerat annertuumik tapersiinerusoq siunnersuuteqartup naqissusepaa. Taamalu pisoqarnissaa ilimaginngikkaluarpaa.
- Ikiorsiinissap aaqqiissutaagallartutut naammassineqarnera tupaallaatigeqaara, taamaalillunimi Inatsisartut aalajangernerat allanngortinneqarpoq, Anna Wangenheim oqarpoq.
Meerartaarniartunut ikiorsiinissamut millionilikkaat aningaasanut inatsimmi tammaaneqariarlutik nassaarineqaqqinnerat tukappallaamik sulinertut taassuma nalilerpaa. Anna Wangenheimilu Peqqissutsimut Naalakkersuisumut aamma Aningaasaqarnermut akileraartarnermullu Naalakkersuisumut tatiginninngllaq, Inatsisartullu uukapaatinneqarsimanerarpai.
- Aningaasanut inatsisissap isumaqatiginninniutaalinnginnerani peqqinnissarlu pillugu isumaqatigiinneq sioqqullugu, taakkunannga akuersinermi piumassuserinngisamik meerartaarsinnaanngitsunut ikiorsiisarnerup peerneqarnissaannik kinguneqarnissaa, ilumut Inatsisartunit partiinut tamanut paasissutissiissutigineqarsimanersoq apeqquterujussuuvoq, taanna oqarpoq.
Apeqqulli taanna akineqarsinnaanngikkallarpoq, taamaattorli angajoqqaanngorusuttunut ikiorsiisarnerup ataavartumik aappaagumiit aningaasanut inatsimmi illuartitsisoqartalernissaa Anna Wangenheimip qulakkeerniarpaa.
- Isummerfigisassatut siunnersuut partiinit tamanit isumaqataaffigineqartoq malersortuassavara, Naalakkersuisunullu apersuiuassaanga ataavartumik aaqqiisoqarnissaa anguniarlugu kimigiisissaanga, taanna oqarpoq.
Aningaasanut inatsisissap isumaqatiginninniutaalinnginnerani meerartaarniartunut aningaasaliisoqannginnissaa pillugu, naalakkersuisut partiinut paasissutissiisimanersut paasiniarlugu, KNR-imit Peqqissutsimut Naalakkersusiumut Agathe Fontainimut (IA) aamma Aningaasaqarnermut Akileraartarnermullu Naalakkersuisumut Erik Jensenimut (S) attaveqarpugut.