Aningaasaliisartut ikileriarnissai ernummataasoq

- Namminersorlutik oqartussat suliffeqarfiutai namminersortunngorsarneqassappata taava ilisimassavarput namminersortut taakkua inissiissasut, soorunami angingaasanik amerlanerpaanik pissarsiffigisinnaasaminnik, S.I.K.-mi siulittaasoq Jess G. Berthelsen oqarpoq, nangillunilu:

- Aningaasaliisummi naatsorsuutigisarpaat aamma piumasaqaatigisarpaat annertunerpaamik erniaqartinneqassasut. Taamaattumillu privatinngorsaasoqassappat ernummatigaarput illoqarfinni anginerni taamaallaat suliffeqarfiit inisseerusunnissaat.

Taamaakkaluartorli isumaqatigiissutaasoq ataatsimut isigalugu isumalluarnartoq S.I.K.-p siulittaasuata oqaatigaa. Tassami suliffissaaleqineq annikilliniarneqarmat.

- Inuussutissarsiutitigut annertuumik inerisaasoqarniarpoq, taamatullu inuussutissarsiutinik inerisaanermut soorunami neriuutigaarput ilaasortatta suliffissaaruttorpassuit sulilerseqqissinnaanissaat.

Isumaqarpugut pingaarnerpaajusoq niuernermut ilisimasaqarluartut siulersuisuniippata.

Isumaqatigiissummi ilaatigut allassimavoq pisortat ingerlatseqatigiiffiutaanni siuttoqarnikkut aamma sukaterisoqassasoq. Piviusunngortinniarneqartut taassaapput piginneqatigiiffinni siuttut nunatsinni najuagaqarnissaat, siulersuisunilu ilaasortani amerlanerussuteqartut nunatsinneersuunissaat piumasariniarneqassasoq. SIK-p siulittaasuatali taajorneqartussat suliaminnut pikkorissuunissai pingaartippaa.

- Isumaqarpugut pingaarnerpaajusoq niuernermut ilisimasaqarluartut siulersuisuniippata. Soorunami nunaqavissunik ilaqartariaqarput, Jess G. Berthelsen KNR-imut oqarpoq.