Aningaasaateqarfiup pilersinneqarnera nuannaarutigaat
- Torrappoq. Isumaqatiginaqaaq taavalu nuannaajallannarluni inuiaqatigiinni ilinniartunut tapersersuisunik taamatut pilersitsisoqarsimanera. Didda Petersen, Nunatsinni ilinniagaqartut kattuffianni, KIK-mi siulittaasoq oqarpoq.
Kalaallit Qallunaat Nunaanni ilinniagaqartut aamma nuannaarutigivaat, Povl Brandtip, Nuummi suliffeqarfimmik Godthåb Betoncentralimik, pisiniarfiusimasumik Magasinimik, kilisaataatileqatigiinnillu Qajaq Trawlimik piginnittup, nuliatalu Dudop, aningaasaqaateqarfimmik Dudo aamma Povl Brandtip aningaasaateqarfianik pilersitsinerat.
- Torraasorujussuuvoq taamatut pilersitsisoqarsinnaammat. Tamakkiisumik Namminersorlutik Oqartussat isumalluutigiunnaarlutigit, periarfissanik ammaasoqarnera nuannaarutigisorujussuuarput.
Qallunaat Nunaanni ilinniagaqartut kattuffianni Avalammik siulittaasoq, Michael Mansi Rasmussen oqarpoq, nangillunilu:
- Iluaqutaassaqaaq immaqa ingammik nunanut allanut ilinniariarniartunut imaluunniit praktikkeriarniarlutunut. Ajornartorsiortit tassani naapinneqakkajuttaramik, tapiissutit soorunami killeqarmata.
Dudo aamma Povl Brandtip aningaasaateqarfia katillugit 16 millionit koruuninik aningaasaateqarpoq. Taamaattumik aningaasaateqarfiup ukiumut 800.000 koruuniniit 1,2 millionit koruunit tikillugit ilinniartunut agguaattarnissaat siunniuteqqavaa.
Aningaasaateqarfiup siulittaasua, eqqartuussisuserisoq, Michael Kjeldsen, KNR-imut oqaluttuarpoq, Dudo aamma Povl Brandtip aningaasateqarfiata atuutilernera KNR-ikkut tusarliunneqarmat, akunnerit 24-it ingerlaneranni qinnuteqaatit siulliit qulit tiguneqarsimasut. Taakkualu maanna naliliiffigineqarnialersut.
