Angut qaqqamit nakkarluni ajunaarpoq
NUTARTIGAQ NALUNAAQUTAQ 12:34
Angut qallunaaq 57-nik ukiulik – politiit oqaluttuarnerat naapertorlugu qaqqap Ukkusissat qaavanut pisussimavoq. Angut taanna Ukkusissat qaarpiaata sivingarnani quaassimavoq nakkarlunilu, nakkarnerminilu kingorna toqulluni.
Politiit KNR-imut oqaluttuarput, inummik nakkartoqarsimaneranik nalunaarfigineqarsimallutik.
Politiit tusagassiuutinut nalunaarummik arfininngornermi unnukkut nassiussinerminni, ujaasineq unitsinneqarsimasoq nalunaarutigaat - angut qallunaaq 57-nik ukiulik qaqqamit Ukkusissat qaavanit nakkarnermi kingorna toqusimavoq.
Nuummi qaqqami Ukkusissani arfininngornermi sillimarniarnermik suliaqartut politiit qatserisartullu ualikkut unnukkullu ulapipput.
Nuummi qatserisartut Issittumi Sakkutooqarfiup helikopteria politiillu ujaasitinneqarput.
Qaqqamit nakkartoqarsimaneranik politiit nalunaarfigineqarnermi kingorna ujaasineq aallartippoq
Aamma atuaruk Nuummi qaqqami Ukkusissami inuk ujaarineqarpoq
Angut 57-nik ukiulik ajunaarsimasutut nalunaarutigineqartoq - Ukkusissat naqqata missaanni sivinganermi nassaarineqarmat.
Annaassiniarlutik ujaasisut nakorsaata angutip 57-nik ukiullip nassaarineqarnerani, qaqqamit nakkarnermi kingorna ajoqusernerminit toqusimasoq uppernarsarsinnaasimavaa, Kalaallit Nunaanni politiit tusagassiuutinut nalunaaruteqarlutik taama allapput.
Kalaallit Nunaanni politiini pigaartup, Mads Lyngep, oqaluttuarnera naapertorlugu, angut quaaffigisaminit 500-nik appasitsigisumi nassaarineqarpoq.
Ajunaartoqarsimaneranik nalunaarut arfininngornermi ualikkut nalunaaqutaq 15:58 politiinut nalunaarutigineqarpoq, ajunaarnerli nalunaaqutaq pingasut missaani pisimassangatinneqarluni.
- Angut 57-inik ukiulik kisimiilluni qaqqaliarsimavoq, nalaatsortumilli quaattoq takuneqarsimalluni. Takunnittup mobilia sarfaarussimammat qaqqamiit ammukaqqaarluni ikiortissarsiorsimavoq, Kalaallit Nunaanni politiini pigaartoq Mads Lynge taama oqarpoq.
Politiiniillu mianersoqqussut aamma apuuppaa:
- Inuit qaqqami angalatillutik mianersornissaat kajumissaarutigaarput, silami kiatsinneranit quasattorujussuanngoqqagami, Mads Lynge oqarpoq.
57-inik ukiullip ilaqutai nalunaarfigineqareerput.
