Angut 60-inik ukiulik hashimik eqqusseriaraluarluni Kangerlussuarmi paasisaasoq
Angutip - nammineq oqarneratut - hashimik 800 grammit missaanniittumik nunatsinnut anngiortumik eqqussinermigut ilaquttanilu juulliornissaminnut aningaasassaqarnissani anguniarsimagaluarpaa, aviisi taama allappoq.
Angut pineqartoq Esbjergip Eqqartuussiviani nassuiaavoq hashi eqquteriaraluakkani, qaammatit arlallit ingerlanerini 100 grammikkuutaarlugu Christianiami pisiarisimani 200.000 koruuninik iluanaarutigisinnaallugu, aningaasallu taakku juullikkuni qaammatinilu tulliuttuni inuussutigisinnaassallugit naatsorsuutigisimavaa.
AAMMA ATUARUK Ikiaroornartoq pillugu suliami inuit aqqanillit tigusarineqartut
- Juullisiornissarput annaateriaraluarpara. Ukiut arfinillit matuma siorna kilisaammi inuttaallutinga qitinnik ajoqusernerma kingorna aningaasaateqanngilagut. Pisortanit ikiorsiissutit isumalluutigaakka, taamaammat haship annersaata Kalaallit Nunaanni tuniniarneratigut aningaasanik iluanaarniaraluarpunga, angut 60-inik ukiulik, JydskeVestkysten naapertorlugu taama oqarpoq.
Aviisi naapertorlugu, angutip parnaarussaalluni pilligaanissaa unnerluussisussaatitaasut piumasaraat, illersuisuatali piumasaraa inuttut atugai immaqalu pinerloqqissagaluaruni aatsaat naammassisassamik eqqartuunneqarnissaa pillugu misissuisoqassasoq.
Eqqartuussisullu tamanna isumaqataaffigaa, angullu 60-inik ukiulik eqqartuunneqannginnermini Pinerluttunik Isumaginnittoqarfimmit oqaloqatigineqartussanngorpoq, aviisi JydskeVestkysten taama allappoq.