Sara Olsvig: Angerlarsimaffeqanngitsut samminngippallaarpagut
Nunatsinni angerlarsimaffeqanngitsut 878-iusut, kommunimit kisitsisit nutaat takutippaat. Kommunilli assigiinngitsumik nalunaarsuisarmata, qassiuneri nalorninarpoq. Sara Olsvig passisutissanik patajaannerusunik kissaateqarpoq:
- Aaqqissuussaanerusumik kisitsisinik tatiginarnerusunik katersisalernissarput suliariniaripput, tamanna takorloorneqarsinnaavoq ukioq allorlugu suliarisassagipput taamaalilluta ukiut ingerlanerini ineriartorneq qanoq innersoq malinnaaffiginerulersinnaaniassagatsigu aamma pinaveersaartitsiniarnermi suliniutit iluaqutaanersut aamma malinnaavigilersinnaaniassagatsigit, Naalakkersuisoq oqarpoq.
AAMMA ATUARUK Innuttaasut 878-it angerlarsimaffeqanngitsuupput
Kommunit qanimut suleqatigalugit
Angerlarsimafeqanngitsut pillugit suliat pitsaanerulersikkusullugit Naalakkersuisup kommunit qanimut suleqatigerusuppai. Suleqatigiinnikkut angerlarsimaffeqanngitsut aningaasaateqaratik pilersaaruteqaratillu Danmarkiliartarnissaat pinngitsoortinniasavaat.
AAMMA ATUARUK Angerlarsimaffeqanngitsunut iliuusissat ujartorneqarput
- Kommuninut paasiniaassaanga kommunini ataasiakkaani qanorpiaq iliortoqarnersoq aammali iliuuserineqartut kommunini arlaanni pitsaasututut sunniuteqarluartullu nalilerneqarpata kommuninut allanut aamma siammarneqarsinnaanissaat eqqartussavarput, Sara Olsvig oqarpoq.
Taanna isumaqarpoq, angerlarsimaffeqanngitsut tamarmik issilinnginnerani iserfissaqartariaqartut. Massakkorpiarli illoqarfinni allani angerlarsimaffeqanngitsut atugaqarnersut ilisimanngilaa.
- Massakkorluinnarlu ilisimanngilara kommunini ataasiakkaani qanoq neqooruteqartoqarnersoq nalunngilara Nuummi aalajangersimasunik neqerooruteqartoq, illoqarfinnili allani suunersut naluakka. taamammat paasissutissat taakkua katersussavakka taava nalilissuarput naammannersut, Naalakkersuisoq KNR-imut oqarpoq.
AAMMA ATUARUK Inuttut ajornartorsiuteqartut ikiorneqartariaqarput