Kisitsisit nutaat: Innuttaasut 878-it angerlarsimaffeqanngitsuupput

Namminersorlutik Oqartussat nunatsinni angerlarsimaffeqanngitsut qassiunersut paasiniarlugu kommuninit kisitsisinik katersisimapput, kommuninilu innuttaasut 878-it angerlarsimaffeqanngitsutut nalunaarsorneqarsimapput.

Inuit Ataqatigiinneersoq Aaja Chemnitz Larsen Inatsisartunut ukiaq ilaasortanngoqqippoq, tamannalu iluatsillugu nunatsinni angerlarsimaffeqanngitsut pillugit Naalakkersuisunut paragraf 37 naapertorlugu apeqquteqaateqarpoq.

Chemnitz Larsenip parteeqataa, isumaginninnermut naalakkersuisoq Sara Olsvig, akissuteqarluni allappoq innuttaasut angerlarsimaffeqanngitsut amerlassusaat pillugu naalakkersuisoqarfik kisitsisinik pigisaqanngitsoq, naalakkersuisoqarfilli kommuninut paasiniaasimasoq.

Kommune Kujallermi angerlarsimaffeqanngitsut katillugit 173-iupput, Qaqortumi 72-it, Nanortalimmi 38-t Narsamilu 25-t.

- Kommunip ilisimatitsissutigaa angerlarsimaffeqanngitsut ukiuni kingullerni tallimani amerliartorsimasut, Sara Olsvig Kommune Kujalleq pillugu taama allappoq.

Qeqqata Kommuniani 2017-imi angerlarsimaffeqanngitsutut nalunaarsorneqartut katillugit 78-iupput, Kommuneqarfik Sermersuumilu angerlarsimaffeqanngitsut katillugit 469-iullutik.

AAMMA ATUARUK Sermersooq Containerinik angerlarsimaffeqanngitsut inissaannik pisisoq

Qaasuitsup Kommuniani innuttaasut angerlarsimaffeqanngitsut katillugit 121-upput.

Sara Olsvigip akissutaa naapertorlugu kisitsisit nalorninaateqarsinnaapput, innuttaasup angerlarsimaffeqanngitsutut nalilernissaanut kommunit assigiinngitsunik periaaseqarmata.

Angerlarsimaffeqanngitsut ukiuni kingullerni tallimani amerlisimanersut Chemnitz Larsenip apeqqutigaa, Sara Olsvigilli tamanna akisinnaanngilaa Namminersorlutik Oqartussani paasissutissanik katersuisoqaranilu nalunaarsuisoqanngimmat.

AAMMA ATUARUK Kalaallit inuusuttut angerlarsimaffeqanngitsut amerlipput

AAMMA ATUARUK Angerlarsimaffeqanngitsup mattussaanera: Fagchefi suliunnaarallartinneqarpoq