Angalasut juullertinnagu apuuffissaminnut anngutissapput
Qulimiguullip aquttumik aqunneqarani ingerlasaataa asersimavoq. Taannalu atornagu qulimiguulik ingerlasinnaagaluartoq, aquttumik aqunneqarani ingerlasaat atorsinnaanngippat sila taartillugu angalanissaq inerteqqutaavoq.
Tamanna pisuulluni sapaatip akunnera kingulleq silap qaamanerinnaani angallassisiinnaasimapput, avannaanilu qaamaneq ukiumi amigaataasarmat akunnattoorfiusimavoq.
Taartissat utaqqineqarput
Maanna qulimiguullip taartissaa Canadamiit Ilulissanut apuunneqarnissaa utaqqineqarpoq, aqagu aqaguaguluunniit apuunnissaa ilimagineqarluni.
- Angalasut ingerlasinnaajunnaarnerat, silap, anorip, teknikkip taarneratalu iluatsitsinngittoortitsinerat peqqutaapput, Air Greenlandimi Attaveqaqatigiinnermut pisortaq, Christian Kjeldsen oqarpoq.
Aamma atuaruk Qulimiguuleeqqap akornuteqarnerata Qeqertarsuup Tunuani angallanneq unitsikkaa
Uummannap eqqaata silapilunnera kinguaattoorutinut ilaavoq, silallu naalagaaffigisinnaannginnera pilersaarutinut eqquinerarpaa.
Air Greenlandip Disko Line attartorpaa
Air Greenlandimi qulimiguullit ingerlatsivitik isumagisariaqarmassuk avannaanut qulimiguulimmik taartissamik tikisitsisinnaasimanngillat.
Ilaasut Aasiannut Qeqertarsuarmullu anngukkusullugit ullaaq manna Air Greenlandip Disko Line angallassinissaanut attartorpaa. Ilulissaniilli aallareerluni motooria ajortimmat Ilulissanut utiinnartariaqarsimavoq.
- Ullumi angallammik iluatsissinnaanngitsoq paasivara, neriorsuutiginaguli aqagu ingerlanneqarsinnaanissaat ilimagaara. Silalu atoruminassanersoq aqagu takujumaarparput, Christian Kjeldsen oqarpoq.
Qulimiguulimmik saniatigut ataatsimik angallassisoqassaaq
Pisut tunngavigalugit Air Greenlandip angalasussat juullertinnagu apuunniarlugit qulimiguulinnut aquttumik pissarsisimapput.
- Avannaani qulimiguulik ulluni qaninnerni aaqqissaaq, angalasullu apuunnissaat qulakkeerniarlugu saniatigut aamma qulimiguulimmik ataatsimik aquttulerlugu angallassisoqalissaagut, Christian Kjelsenip nalunaarutigaa.
Taassumallu pilersaarutitik malillugit suli sapaatip akunneranik periarfissaqarnertik tunngavigalugu angalasut juullertinnagu apuuffissaminnut anngunnissaat ilimagilluinnarpaa.