Aneerasaartarfiit meeqqanut isumannaallisarneqaleruttorput

Nukappiaraq annappoq; ajutoorneq qarmap ungaluusallu akornata angivallaarneranik pissuteqarpoq, ingerlaannarlu sanaartukkat nutaat meeqqanut ulorianarsinnaanersut misissuiffigineqalerpoq.

Ajutoornerup kinguninngua paasinarsivoq aneerasaartarfiit sananerini sanaartornermut malittarisassat malinneqarsimanngitsut.

Ilutigitillugu kikkut aneerasaartarfinnik kukkusumik ikkussuisimanersut akisussaasuunersullu misissuiffigineqalerput. Sanaartortitsisumiinnersoq, sanaartortumi imaluunniit nakkutilliisuniinnersoq.

Politiit suliamut akulerunneqarput, misissuineralli suli ingerlavoq.

Ineqarnermut pisortaqarfik nalunaarpoq, inissiani nutaani aneerasaartarfiit - tassa Tuapannguani inissiat - nukappiaqqap 14-inik qaammatillip juunimi quleriit arfernanniit nakkarfianisut ittut, Qinngutsinni Pingorsuarmi inissiat aamma Dronning Ingridip Peqqissaaviani sulisunut inissiat, juulip aallaqqaataa tikitsinnagu misissuiffigineqarsimasut aaqqiingallarfigineqarsimasullu.

Inissiani najugallit attaveqarfigineqarsinnaanngikkaangasa, Inissiaatileqatigiiffiup INI'p periarfissaqaleraangami aaqqiivigisarsimavai.

Qarmamiit ungaluusanut avissaanganerata 12 centimeteri qaangersimangaangangu INI aaqqiigallartarpoq, pisortaqarfilli nalunaarpoq aggustimi aaqqiissutissanik piujuartussanik ikkussuillutik aallartittoqarsimasoq.

Taakku saniatigut inissiat meeqqanut isumannaallisaatinik ikkussuiffigineqassapput. Suliarli taanna suli naammassineqanngilaq. Aaqqiissutissat piujuartussat ikkussuunnerini inissiat 20-it Tuapannguaniittut kisimik amigaataalersimapput.

Inissiani tamakkunani najungaqartut pissarsiarineqarsinnaasimannginneri patsisaanerarpaat. Pingorsuarmiittut ukioq ataaseq qaangiuppat naammassineqarumaartut oqaatigineqarpoq. Najungaqartut ajoqusersorneqannginnissaat peqqutaavoq, tamakkumi sanaartortitsiviup Permagren-ip sulisuisa alakkaaqattaartarnerat naammagittaalliutigisimavaat.

Pisortaqarfiup naggasiullugu ilisimatitsissutigaa, najungaqartut suliat ineriartorneri pillugit malinnaatinneqarumaartut, naammassivippatalu ilisimatinneqarumaartut, imaappoq juullertinnagu.

Politiini suliaq suli misissuivigineqarpoq. Suliamut attuumassuteqartut arlaannaataluunniit nukappiaqqap nakkarnera suli akisussaaffigiumasimanngilaa.