Tekle Ghebrelul Ammip qalipaataanik immikkoortitsineq akiorneqarli
Arsaalluni sungiusaasartoq ukiuni 14-ni Kalaallit Nunaanni najugaqareerluni ammip qalipaataanik immikkoortitaanermi kingorna nunatsinnit aallangajalluinnarpoq, aallaranili maanna Kalaallit Nunaanni timersortartut kattuffiannut timersortartunut sungiusaasunut inuiaqatigiinnullu kaammattuuteqarpoq isikkamik arsaannermi ammip qalipaataanik immikkoortitsinermi ajornartorsiutip aaqqiivigineqarnissaanut oqaluuserinninnissamut.
AAMMA ATUARUK Aallarnissannut piareeraluarpunga
- Uggornarpoq timersorneq taamatut eqqugaassammat, Tekle oqarpoq - timersornermi taama pisoqarnissaa isumaqatiginngilara, - timersorneq ajunngitsuuvoq peqqinnartuullunilu, timersornikkut tamatta nuannaalersarpugut, timersoraangatta timersoreeraangattalu. Taava sooq assigiinngisitsilluta ajortisaarissaagut, tamanna eqqumiigaaraa, Tekle Ghebrelul oqarpoq, taassuma Isikkamik Arsaattartut Kattuffiat isumaqatigaa, isikkamik arsaattartup assimik ikkussisimasup piffissap sinnerani arsaqqusaajunnartimmagu.
AAMMA ATUARUK Arsaattartoq ammip qalipaataanik assigiinngisitsisoq
Taassuma erseqqissaatigaa, pisup kingulliup saniatigut Kalaallit Nunaanni isikkamik arsaannermi ammip qalipaataanik immikkoortitsisoqarnerata nassuerutiginissaa tamassumalu qanoq iliuuseqarfigineqarnissaa pingaaruteqarmat, Tekle oqarpoq.
- Piffissanngorpoq Kalaallit Nunaanni tamarmi paasineqarnissaa, sunalu tamaat paquminartoq oqaluuserinaveersaarnagu, oqarlunilu maani taama pisoqarneq ajorpoq ajornavianngilamik oqalukkunnaarluta, Tekle oqarpoq, - iliuutitsik pineqartunut imaluunniit eqqugaasunut qanoq kinguneqarsinnaanera eqqarsaatigineq ajorpaat, Ghebrelul oqarpoq.
AAMMA ATUARUK Kâgssagssuk utoqqatsertoq
Taassumalu neriuutigaa, Kalaallit Nunaanni Arsaattartut Kattuffia timersoqatigiinnut iliuusissanik innersuussutinillu suliaqarumaartoq.
- Tassani pineqarlutik timersornermi naleqartitat ileqqullu. timersortoqartillugulu unammisanut, illoqarfimmit allaneersuuppata nunanilluunniit allaninngaaneersuuppata ataqqinninnermmik takutitsinissaq, tamattalu immitsinnut qanoq pissuseqassanerluta, Tekle Ghebrelul oqarpoq.
AAMMA ATUARUK Ammimi qalipaataa tunngavigalugu nikassarneqarnini aalassaatigigaa
