Ammassassuarniarnermi kalaallit aalisariutaataat salliutinneqassasut
Ammassassuillu 20.000 tonsit saarullernallu 10.000 tonsit tamatumani pisassiissutigineqarput.
Tusagassiorfinnut nalunaarummi erseqissaatigineqarpoq ammassassuit saarullernallu misiligutaasumik maannamut suli aalisarneqassammata, taakkua sumiiffigisartagaat qanorlu amerlatigineri paasissallugit suli pisariaqartinneqarmat, aamma uumassusiisa paasissutissartaat katersorneqassammata.
Tamatumunnga peqatigitillugu ammassassuit saarullernallu aalisarneqarsimasut akitsuuserneqassanngitsut oqaatigineqarpoq.
- Taamaattumik kalaallit aalisariutaataannik aalisarneqarpata nunap karsiata aningaasalersorneqarneranut tapertaassapput, kalaallit aalisariutini inuttat suliffissaqartinneqassammata taakkulu Nunatsinnut akileraartarlutik, tusagassiorfinnut nalunaarummi tamanna atuarneqarsinnaavoq.
AAMMA ATUARUK Avaleraasartoortassiinermi kalaallit salliutinneqartut
Pisassiissutigineqartut paggatassiissutaassapput
Aammattaaq erseqqissaatigineqarpoq avaleraasartuut aalisarneqarnerisa nalaanni ammassassuit aalisarneqassammata. Aalisariutit avaleraasartoorniarnissamut akuersissutaatillit saarullernanik aalisarsinnaanermut akuersissutinik tunineqarsinnaapput.
Aalisariutit ammassassuanniartut saarullernanniartullu killilersuiffigineqarneq-ajorput, pisassiissutigineqartulli nungunneqaraangata aalisarunnaartarput – aalisakkat paggatassiissutaasarmata.
Avaleraasartoorniarnerup juunip aallartissimalerani aallartinnissaa naatsorsuutigineqarpoq, ammassassuanniarneq kingusinnerulaartukkut aallartissalluni, saarullernallu qaqugu aalisarneqarsinnaalernissaat erseqqissumik suli oqaatigiuminaalluni.