Amerlanerusut kommunimut qinersisariaqartut
Inuusuttut kommunimi politikkimik soqutiginnilersittariaqarpagut, aamma innuttaasut aalajangiinernut pingaarutilinnut peqataatinneqartariaqarput. Naalakkersuisup Múte Bourup Egedep (IA) KANUKOKA-llu siulittaasuata Simon Simonsenip Qanoruumi ataasinngornermi unnukkut taakku pingaarnertut saqqummiuppaat.
Kommunip kattuffiata KANUKOKA-p, nunatsinni kommunit pingasut ilaasortaaffigisaata, kommunalbestyrelsini annertuunik pingaarutilinnillu aalajangiisoqassatillugu politikerit innuttaasunik ataatsimiititsinernut amerlanerusunut qaaqqusisarnissaat kaammattuutigaa.
KANUKOKA-p siulittaasua Simon Simonsen taama oqarpoq.
- Taamaaliortoqarneratigut illoqarfinni tamani innuttaasut misigisimassapput akisussaaqataallutik oqallinnermullu peqataallutik. Immaqa aamma aalajangiinernut sunniuteqaqataanerulerlutik misigisimassapput, KNR-imut taama oqarpoq.
Inuusuttut kommunimi politikkimut soqutigisaqannginnerat, qinersisinnaatitaasut 40 procentiisa ullormi qinersiffiusumi qinersiartunngitsoortarnerannut nassuiaatissap ilagivaa. Tamannalu politikerinut pisussaaffiliivoq, naalakkersuisoq kommuninut akisussaasuusoq, Múte Bourup Egede, taama oqarpoq.
- Inuusuttut peqataatinniassagutsigit nutaaliortariaqarpugut naleqqussarlutalu, naalakkersuisoq oqarpoq.
- Nunatsinni akisussaaqataanissaq pilerinarninngortittariaqarparput, Múte Bourup Egede taama naggasiivoq.