Amerikap avannaani sanilitsinnik suleqateqarneq nukittorsarusukkaat
Ataatsimut unammilligassat periarfissallu – tassunga ilanngullugit aningaassarsiornikkut ineriartornissamik periarfissat kiisalu attaveqaatinik aningaasaliinernillu periusissianik pisariaqartitsinerit oqaloqatigiissutigineqarput.
Ataatsimiinneq North American Arctic Regional Leaders’ Summitimik taaguuteqartoq, isummersuisinillu ataqqisaasunit The Woodrow Wilson Centerimeersunit aaqqissuunneqarluni.
Nunat naalakkersuisuisa sinniisui suliffissuarniillu sinniisut ataatsimut soqutigisat, unammillernartitat suleqatiginnissamullu periarfissat oqaloqatigiissutigineqarput – tassunga ilanngullugit Issittumi aningaasaqarnikkut ineriartorneq, attaveqaatit aamma nalunaarasuarnikkut attaveqaatinik pisariaqartitat.
Sanilitsinnut kulturikkut ataqatigiiffeqarpugut
Kingusinnerusukkullu oqalliseqatigiissitsisoqarmat, Naalakkersuisut anguniagaat Nunattalu ineriartornissaanut takorluugaat kiisalu nunarsuup immikkoortua akimorlugu suleqatigiinnissamik periarfissat Vittus Qujaukitsup saqqummiuppai.
- Issittumi nunarsuup immikkoortua akimorlugu ineriartornermik suleqatigiinnerunermillu pilersitsinissaq Kalaallit Nunaata kissaatigaa. Matumanilu Amerikap avannaani nunanik sanilitsinnik suleqateqarnerup patajaallisarneqarnissaa Kalaallit Nunaannut annertuumik pingaaruteqarpoq, Vittus Qujaukitsoq taama oqarpoq.
- Alaskami, Yukonimi, Northwest Territoriesimi Nunavumilu sanilitsinnut pissusissamisoortumik kulturikkut ataqatigiiffeqarpugut, peqatigisaanillu unammillernartunut annertuunut periarfissanullu assigiissumik inissisimavugut, taamaanneratalu pissusissamisoortumik suleqatigiissippaatigut, nunanut allanut naalakkersuisoq oqalliseqatigiissitsinermi taama oqarpoq, issittumilu nunat akimorlugit suleqatigiinnerup nukittorsaqqinnissaa ineriartorteqqinnissaa qilanaarinerarlugu.