Politikki

VIDEO Ambassadørit Inatsisartuni meeqqat samminerulissavaat

Meerartatta nipaat nippaarissumik ersarissumillu politikkikkut oqallittarnerni tusaarneqarnerulissaaq. Tamanna qulakkeerneqarpoq politikerit partiinit assigiinngitsuneersut meeqqat ambassadøriattut toqqarneqarmata.

Allattoq Bikki P. Kleist, Sivert Olsen

novembarip 10-at 2015 15:52

”Sassarpunga politikikkut meeqqat inuusuttullu pisinnaatitaaffii eqqumaffigineqarnissaat anguniarlugu”, meeqqanut ambassadørit Inatsisartuninngaanneersut ullumikkut atsiugaanni taama allassimasoqartoq takuneqarsinnaavoq.

Demokraatinit Tillie Martinussen meeqqanut ambassadøritut toqqarneqarpoq, Mimi Karlsen Inuit Ataqatigiinnit, Anthon Frederiksen Partii Naleqqamit Vivian Motzfeldtilu Siumumit meeqqanut ambassadøritut toqqarneqarlutik, Atassummit kina meeqqanut ambassadøriussanersoq suli toqqarneqanngilaq.

Aamma atuaruk Meeqqat Illersuisuata isornartorsiuineq akerlilerpaa

Toqqarneqartut nunatta siunissaasa nipaat tusaanerulernissaat qilanaaraat.

- Inuiaqatigiinni ataqqineqartutut aamma pinissaat taanna angujumallugu qilanaarpunga sulinissannut, Mimi Karlsen KNR-imut oqarpoq.

- Avannaaniikkanni, kujataaniikkaanni, tunumiikkaanni, nunaqarfimmiikkaanni savaateqarfimmiikkaanni periarfissat assigiinngitsorujussuupput, Vivian Motzfeldtip aalajangersumik oqaatigaa.

Aamma atuaruk Meeqqat Illersuisuata isornartorsiuinera peqatigiiffiit paasisinnaavaat

Politikerit meeqqat eqqummaariffiginerussavaat

Meeqqat Illersuisuata Aviâja Egede Lyngep meeqqanut ambassadørit Inatsisartuni meeqqat samminerulernissaat qilanaaraa.

- Meeqqat pisinnaatitaaffii aamma politikerit ulluinnarni sulinerminni aamma ilisimasaqarfiginerullugillu, kisianni aamma eqqummaariffiginerullugit, sammisinnaanerullugit, tassa taanna siunertaralugu taamatut aalajangersimavugut. Nuannaarutigaarpullu politikerit peqataarusummata.

- Meeqqat pisinnaatitaaffii inuiaqatigiinni tamanut anngunnissaat suliassarigatsigu. Taavalu politikerit taakkuullutik aalajangiisartut assigiinngitsorpassuarnik inuiaqatigiinnut meeqqanullu sunniuteqartartunik. Taava politikerinik taamatut ambassadøreqarnikkut aalajangiileraangamik immaqaluunniit arlaatigut oqallinnerminni meeqqat eqqaamajuarnissaat kissaatigigatsigu taamatut iliorsimavugut, Aviâja Egede Lynge oqarpoq.

Meeqqanut ambassadørinngortut, 2017-ip naanissaata tungaanut qinigaasut, Meeqqat Pisinnaatitaaffii pillugit Naalagaaffiit Peqatigiit isumaqatigiissutaat pillugit Meeqqat Pisinnaatitaaffiinik Sullissivimmit MIO-mit saqqummiiffigineqarput.

Aamma atuaruk VIDEO Meeqqat Ikiortigit: Kalaallit Nunaat qujanaq