Allagaatinik takunnissinnaatitaanermik noqqaasoqarnera Hardenbergip unitsinniarsarisimavaa
Kukkunersiuisut nalunaarusiaannik, Hardenbergip Nukissiorfinni pisortatut nammineq tunuannginneranik takutitsisumik, ilaatigut KNR aamma AG takunnissinnaatitaanermik noqqaassuteqarmata, Svend Hardenberg pereersimasunit angujartorneqalerpoq.
Naalakkersuisummi siulittaasuata naalakkersuisoqarfiani pisortap, Hardenbergip, suliamut akuliunniarsarisimanera tusagassiortullu allagaatinik takunnissinnaatitaanermik noqqaassuteqarnerannik akornusersuiniarsimanera aviisimi AG-mi allaaserisani arlariinni maanna ersersinneqarpoq.
Kukkunersiuisut nalunaarusiaat, tusagassiortunit pissarsiariniarneqartoq, Hardenbergip Nukissiorfinnit soraarsitaasimaneranik takutitsivoq, ilaatigut oqarasuaatinik internettimillu killeqanngitsumik atuinissamik aaqqissuussinermik atornerluisimanera aammalu suliffeqarfiup biilianik atuinnginnermigut aningaasatigut ajunngitsorsiassaqartinneqaraluarluni suliffeqarfiup biilianik atuiinnarsimanera pissutigalugit.
Svend Hardenbergip suliamut attuumavallaarnini nalunaarutigisimavaa, taamaakkaluartorli Ineqarnermut, Pinngortitamut Avatangiisinullu Naalakkersuisoqarfiusimasumi pisortaq Olafur P. Nielsen suliaq pillugu ataatsimeeqatiserivaa ataatsimiinnerullu imaqarniliarineqarnera malillugu eqqartuussissuserisumik avataaneersumik aamma imitsisimavoq, taanna kukkunersiuisut nalunaarusiaata avammut saqqummiunneqannginnissaanut aaqqiissutissamik nassaarsinnaanissaa neriuutigalugu.
- Tassunga ilanngullugu Svendimit kissaatigineqarpoq saaffiginnissutigineqartut eqqartuussissuserisumut Poul Knudsenimut innersuunneqassasut, taassuma paasiniarneqartut imarisaat nalilerniassammagit, imaqarniliami ilaatigut taama allaqqasoqartoq aviisimi AG-mi allaaserineqarpoq. Tassalu Hardenberg eqqartuussissuserisutut suliffeqarfimmit Malling og Hansen Dammimit avataanit ikiorneqarnissamik noqqaasimavoq.
Tamannalu pissutigalugu ombudsmandi suliamut maanna akuliuppoq. Pineqartormi Hardenbergimut tunngasuuvoq, taamaattumillu ingerlatsinermi inatsit naapertorlugu allagaatinik takunnissinnaatitaanermik nooqqaasoqarnerata suliarineqarneranut peqataaqqusaanngilaq, allatigulluunniit suliarineqarneranut qanimut peqataaqqusaanani.
Ataatsimiinnerulli kingorna Olafur P. Nielsenip nassuaatini AG-mut allanngortissimavaa. Nammineq kingorna ataatsimiinnermi pisut paarlattuanik allattoorsimagunarluni, namminerlu kaammattuutigisaminut Hardenbergip akuersisimaneranik allassimasuuguni pitsaanerusimassagaluartoq.
KNR-ip AG-llu allagaatinik takunnissinnaatitaanermik noqqaanerisa akissuteqarfigineqarnissaat sioqqullugu, Svend Hardenberg Sermitsiap aaqqissuisuuneranut saaffiginnippoq, isornarsinnaasunillu apeqquteqarfigineqarani nittartakkakkut Sermitsiaq.AG-kkut nammineq nassuiaateqartinneqarluni. Taamatullu periaaseqarneq sakkortuumik isornartorsiorneqarpoq, Svend Hardenbergimmi Namminersorlutik Oqartussani qullersatut inissisimanini atorlugu, allagaatinik takunnissinnaatitaanermik noqqaassuteqartoqarnera sioqqullugu allaanerusumik nassuiaateqarsimammat.
AG-mi allaaserisami maanna paasinarsivoq allagaatinik takunnissinnaatitaanermik noqqaassutip akineqarnissaa pinngitsoortissinnaanagu paasigamiuk, Hardenbergip Sermitsiap aaqqissuisuuneranut aatsaat saaffiginnissuteqarsimasoq.
