Akunnermusiat agguaqatigiissillugit 1,50 koruuninik qaffassapput

Sulinermik inuussutissarsiuteqartut taamaalillutik akissarsiat pisissutaasinnaasut qulakkeeraat SIK-p siulittaasuata nalilerpaa.

- Naammagisimaarpara, minnerunngitsumik neriuuteqarama, soorlu oqartunga uuliap akia appariartorsimavoq, neriuuteqarama aningaasarsiat pisissutigineqarsinnaanerat taamaasilluni ukiuni pingasuni tulliuttuni attassinnaassallugu, SIK-p siulittaasua Jess G. Berthelsen taama oqarpoq.

Taassuma Sulisitsisut Peqatigiiffianni sulisitsisut peqatigalugit apriilip aallaqqaataaniit ukiuni pingasuni atuuttussamik isumaqatigiissuteqarfigai.

Ilinniarsimanngitsut akunnermusiaat qaffassapput

Isumaqatigiissut naapertorlugu ilinniarsimanngitsut akunnermusiaat apriilip aallaqqaataaniit 1,40 koruuninik ukiut tamaasa qaffattassapput. Taamaalillutik ilinniarsimanngitsut aqagumiit, isumaqatigiissut nutaaq malillugu akunnermut 85,50 koruunisiaqalissapput.

Ilinniarsimasut qaffariaataat annertunerulaarpoq, akunnermut 1,60 koruuniugami. Taakku qaaffariarnerat maanna akunnermut 102 koruuninngorpoq.

Isumaqatigiinniarnerni SIK matumuuna sanaartornermik, HK-mi,sullissinermi angallassinermillu sulialinnut ilinniarsimasunut ilinniarsimanngitsunullu annertuumik qaffaanissaq toqqarsimavaa.

- Imatut ilinniarsimasuugaanni, ukiuni sisamani ilinniarsimaneq aamma qaffaatinut tassunga aamma assigiittariaqarmat, Jess G. Berthelsen oqarpoq.

Akissarsiat pisissutaasinnaassuseqalersinniarneqarput

Akissarsiat qaffannissaannut isumaqatigiissutigineqartut nioqqutissat akiisa ukiuni tulliuttuni pingasuni qaffannissaannut akitsuutissatullu siunnersuutigineqartunut malinnaasinnaassasut naatsorsuutigineqarpoq. Akissarsiat pisissutaasinnaassuseqarnerulissapput, naak aningaasat aamma naleerukkiartorsinnaagaluartut.

Uuliap nappartamut akikilliartornera ilaatigut pissutaavoq:

- Tassa neriuutigaara, tassa ukiut pingasut aatsaat qaangiuppata soorunami oqaatigisinnaanngussavara isumaqatigiissut taanna angusimasarput pitsaasuusimanersoq, kisianni neriuuteqarpunga, uuliap akia appariartungaatsiarsimavoq, taamaattumik taassumannaalluunniit isumalluartippaatigut aningaasarsiat pisissutigineqarsinnaanerat ukiuni pingasuni tulliuttuni atasinnaassasoq, SIK-p siulittaasua Jess G. Berthelsen taama oqarpoq.

Akissarsiat qaffannissaannut isumaqatigiissutit saniatigut sulisitsisut Ilinniartitaanermut Aningaasaateqarfimmut ukiuni tulliuttuni pingasuni ukiumut 150.000 koruuninik aningaasaliisarniarput. Akissarsiat pillugit isumaqatiginninniarnerni aatsaat taama pisoqartoq Jess G. Berthelsen oqarpoq.