Akitsuusiineq aningaasanik atornerluinerinnaassaaq

Qalerallit suliarineqanngitsut akitsuuserneqarpata tamanna Nunatta karsianut iluaqutaanavianngitsoq, GE-p pisortaa, Brian Buus Pedersen oqarpoq.

- Takusinnaasarput malillugu tamanna aningaasanik atuinerlunnertut oqaatigisariaavoq. Akitsuusiinissamillu pilersaarut tamanna aalisarnermut attuumassuteqartunut soorlu aalisakkerivinnut, kilisaataatilinnut aalisartunullu paasiniaqqaarnagu inatsisissatut siunnersuuteqartoqarnera tunngaviusumik isornartorsiorparput isumaqaratta tamanna sianiilliornerusoq annertooq.

GE-p pisortaa, Brian Buus Pedersen oqarpoq.

Qalerallit niaquerneqanngitsut paperuerneqanngitsullut kangiani Asiamiunit mamarineqarluartarput akigissaartinneqartarlutillu.

Aningaasarsiutigineqarluaraluarput

Qalerallillu Nunatsinni suliarineqanngitsut aalisakkerivinnit niuerneqarnerat taakkuninnga aningaasarsiutigilluarneqartarput taamaalilluni tamanna aamma Nunatta karsianut pitsaasumik kinguneqartarluni.

Qalerallilli suliarineqanngitsut akitsuuserneqarpata tamanna killuup tungaanut saatinneqarsinnaasoq, Brian Buus Pedersen isumaqarpoq.

- Nunatsinni aningaasarsiornerput killuup tungaanut saatinneqarsinnaalluarpoq aamma akitsuusiineq suliffinnik amerlanernik pilersitsinavianngilaq, Brian Buus Pedersen oqarpoq.

Paasiniaqqaarneqarsimasussaagaluarpoq

Qalerallit pisarineqareerlutik niaquerneqanngitsut nunami aalisakkerivnni suliffissanik pilersitsissasut Naalakkersuisunit naatsorsuutigineqarpoq. Brian Buus Pedersenili isumaqarpoq tassa taamaattoqarnavianngitsoq.

- Inatsisissatut siunnersuutip allanneqannginnerani suliffissanik tamanna pilersitsisinnaasoq uppernarsarneqaqqaartariaqarsimasuuppat ajunnginnerusimassagaluarpoq. Akitsuusiinermili tamassuma aningaasarsiutigineqarsinnaanera uanga upperinngilara, tassa qaleralik pisarineqarneraniit qerititaq pisiarissallugu pilerigineqarneruvoq. Qeriteriigarlu aasseriarlugu maani suliarineqarpat soorunami tamanna akianut sunniuteqassaaq annertuumik tassa aningaasartuutit annertunerulissammata, taamaattumik isumaqarpunga tamanna aningaasanik atornerluinerinnaassasoq.

GE-p pisortaa, Brian Buus Pedersen taama oqarpoq.

Qalerallit suliareqqinneqanngitsut akitsuuserneqarnerat pillugu siunnersuut novembarip 13-anni naammassineqarluni Inatsisartuni kingullermeerlugu oqallisigineqassaaq.