TNGG akiliisinnaajunnaarpoq Akileraartartut akiliutaat millionerpassuit annaaneqartut

Aatsitassarsioqatigiiffiup ataasinngornermi akiliisinnaajunnaarluni nalunaaruteqarneratigut aningaasat taakku annaaneqarput. Greenland Venturelli aatsitassarsiornermik suliniutinut nutaanut aningaasaleeqqinnissaanut tamanna nangaatitsilinngitsoq, ingerlatseqatigiiffiup pisortaata KNR-imut oqaatigaa.

- Piiaaviup ingerlaannarnissaata ingerlallualernissaatalu qulakkeerniarnissaa Greenland Venturemit pingaarnerpaatillugu sulissutigissavarput, Karsten Høy oqarpoq.

- Rubinisiorfiup siunissaata qulakkeerneqarnissaa kalaallillu piginneqataassutaasa attatiinnarnissaat amerlisarnissaallu Greenland Venturemit pimoorullugu sulissutigaarput, Karsten Høy oqarpoq, aningaasalli qanoq amerlatigisut atorneqassanersut oqaatigiumanngilaa.

- Tamanna erseqqissumik oqaatigisinnaanngilara. Suliffeqarfiup pilersaarutaa misissoqqaartariaqarparput. Sulissutigeqqinnissaanulli periarfissaqarpugut.

- Kisimiillutali makiteqqinniarnissaanut aningaasassaqanngilagut, taamaammat suleqatigisavut avataaneersut annerpaartaanik kivitsinissamut ikiortiserisariaqassavagut, Karsten Høy KNR-imut taama oqarpoq, suliniutillu pitsaalluinnartuunera kingumut naqissuseqqillugu.

Millionerpassuarnik aningaasaliisoq

Greenland Venture TNGG-mut siorna aggustimi 26 millionit koruuninik aningaasaliivoq. Pisortallu tassunga atatillugu suliniut nersualaarpaa, suliniulli naatsorsuutigineqartutut iluatsinngitsoortoq maanna paasivaa.

Karsten Høyili isumaqanngilaq akileraartartut aningaasaataat Greenland Venturemit immeraassutigineqarsimasut.

- Mianersuaalliunngilagut. Suliniutigineqartummi suli pitsaasuulluinnarnera naqissuserneqartariaqarpoq, pisortaq taama oqaerpoq.

Aamma atuaruk True North Gems Greenland akiliisinnaajunnaartoq