Aki-Matilda Høegh-Damip avataarsuata ujaraa 20 tonsiusoq nunatsinnut utertinneqartikkusukkaa
Aasamut Danmarkimukassaguit nunatsinneersumik saqqummersitamik takusaqarnissamut periarfissaqarputit.
Avataarsuatami ujaraa savimmineq nunatta avannaani tunnikoq, 20 tonsimik oqimaassuseqartoq, Københavnimi Geologisk Museumip silataaniippoq.
Folketingimi ilaasortap, Siumumeersup, Aki-Matilda Høegh-Damip oqarnera naapertorlugu oqaluttuarisaanermi naleqartut nunatsinnut utertinneqarnissaannut piffissanngorpoq.
Siumut Folketingimi tusagassiuutinut nalunaarummi ullumi allappoq.
- Nunatsinneersut naleqartut Nunatta avataani maannakkut takuniarneqarsinnaasuupput. Taamaasilluni Kalaallit Nunaanni innuttaasut Nunatsinneersunik naleqartitanik paasisaqarnissamut annaasaqartarput, Nunatsinneersuniillu takuniaassagunik akileeqqaartariaqassallutik, tusagassiuutinut nalunaarummi allassimavoq.
Aki-Matilda Høegh-Dam danskit kultureqarnermut ministerianut, Moderaternemeersumut Jakob Engel-Scmidtimut allakkatigut apeqquteqarnerminut atatillugu tusagassiuutinut nalunaaruteqarpoq.
- Oqaluttuarisaanermit, itsarsuarnitsanik misissuinernit, ujarassiornernit assigisaaniillu tigussaasut nunatsinneersut Danmarkimi pisortaniittut aamma ingerlatsiviiniittut qanoq naleqartigalutillu amerlatigippat?, Aki-Matilda Høegh-Dam Kalaallit Nunaat pillugu ataatsimiititaliaq siulittaasuuffigisani sinnerlugu apeqquteqarpoq.
Tusagassiuutinut nalunaarut naapertorlugu dinosaurit saarngi assigiinngitsut assersuutigalugu dinosaurit saarngi nunatsinneersut Issi Saaneq Danmarkimi Geocenter Møns Klintimi saqqummersitani takuneqarsinnaapput.
Folketingimilu ilasortap tamakku nunatsinnut utertikkusuppai.
