Politiit ullormut nalunaarutaat: Angut Kuummiuni eqqissiviilliortitsisutut tigusaasoq

Politiit oqaaseqarneranik nalunaaqutaq 12.06 nutarterpoq.

Angut Tasiilap eqqaani Tunumi nunaqarfimmi Tasiilap eqqaaniittumi arfininngornermi tigusaavoq.

Angut taanna eqqissiviilliortitsisutut tigusaasoq, Kalaallit Nunaanni politiit pigaartuisa ningiuat Annette Ostenfeldt oqarpoq.

Angut taanna qanorpiaq eqqissiviilliortitsisimanersoq itinerusumik oqaatigisinnaanngikkini, Annette Ostenfeldt oqarpoq imali nangilluni:

- Angut taanna eqqartuussivimmi ippassaq sapaammi sassartinneqarmat ulluni 25-ni tigummineqarallartussanngortinneqassasoq aalajangerneqarpoq, taanna oqarpoq.

Containeri ikuallattoq

Kuummiuni tigusarinninneq eqqaassanngikkaanni ulloq unnuarlu kingulleq sapaatillu akunnerata naanera ataatsimut isigalugit eqqissisimaffiusimasut, politiit pigaartuisa ningiuat oqarpoq.

- Sapaatit akunnerata naanera ataatsimut isigalugu pisarnermit eqqissisimaffiuneruvoq.

Nuulli ilaani Qinngorpumi containerit ilaat ikuallanneranik politiit ippassaq sapaammi unnukkut arfineq marlunngulersoq nalunaarfigineqaramik ornigutilertorput.

- Containeri anginngitsoq ikuallappoq, pisumillu nalunaarutiginnittup containeri ikuallattoq nammineerluni qatseriaraluarpaa, iluatsinngitsumilli.

Containerip ikuallanneranut pissutaasoq ilisimaneqanngilaq, politiiniillu Kuummiuni pisoq pillugu paasissutissinneqaqqinnissatsinnut utaqqilluta.

Angut Kuummiuni tigusaasup ippassaani arfininngornermi aallaasersorsimasutut pasineqarluni tigummigallarneqartoq, politiit pigaartuisa ningiuat Annette Ostenfeldt ullumi ataasinngornermi ullaap tungaani oqarpoq.

- Inunnik ajoqusertoqanngilaq, angullu tigusaasoq tallimariarluni seqqorsimassangatipparput, taanna oqarpoq.

Angut taanna 20-t sinnerlugit ukiuliusoq sooq aallaasersorsimanersoq suliarlu taanna pillugu allamik oqaaseqarsinnaanani, Annette Ostenfeldt aamma ilisimatitsivoq.